ەكى اپتاعا سوزىلعان جازعى ازيا ويىندارى مارەسىنە جەتتى. ءۇمىت پەن كۇدىك ارپالىسقان دودادا ەل سپورتشىلارى دا جارىس كورىگىن قىزدىردى. جالپى، ەلىمىزدىڭ اتىنان 404 سپورتشى 25 وليمپيادالىق سپورت تۇرىنەن باق سىنادى. ءدۇبىرلى دودادا وتانداستارىمىز ايانىپ قالعان جوق. دەگەنمەن، اتتەگەن-اي دەيتىن جاعدايلار دا بولدى. جالپى كوماندالىق ەسەپتە بىزگە بۇيىرعانى - 9-ورىن.
40172288 1921865714528358 4628077709572964352 n
بايراقتى باسەكەدە قىتاي سپورتشىلارى 132 التىن، 92 كۇمىس، 65 قولا (جالپى 289 مەدال) جۇلدەمەن تالاسسىز وزدى. ەكىنشى ورىنعا 75 التىن، 56 كۇمىس، 74 قولا جۇلدەسى بار جاپونيا ەلى جايعاستى. ۇزدىك ءۇشىنشى ورىندى تۇيىندەگەن كورەيا قۇراماسى 49 التىن، 58 كۇمىس، 70 قولا جۇلدە جەڭىپ الدى. جارىستى ۇيىمداستىرۋشى يندونەزيا سپورتشىلارى ءتورتىنشى ورىنعا تۇراقتادى: قورجىندا 31 التىن، 24 كۇمىس، 43 قولاسى بار.
ال قازاق ەلىنىڭ سپورتشىلارى 15 التىن، 17 كۇمىس، 44 قولا، جالپى 76 مەدال ەنشىلەپ، 9-ورىنعا قاناعات ەتتىك. دجاكارتادا نەگىزىنەن ۆەلوسپورت (2 التىن), دجيۋ دجيتسۋ (2 التىن), كوركەم گيمناستيكا (2 التىن), سامبو (2 التىن) شەبەرلەرى ۇزدىك ناتيجەگە جەتتى.
قالا سپورتشىلارىنىڭ قورجىنىندا – 12 جۇلدە
40355664 2134891983393610 2741229676574801920 n1
ءتورت جىلدا ءبىر كەلەتىن دوداعا شىمكەنت قالاسىنان 36 سپورتشى اتتانعان ەدى. ورەندەرىمىز 12 جۇلدەمەن ورالدى: 3 التىن، 3 كۇمىس، 6 قولا جۇلدە. اسىرەسە، كوركەم گيمناسشىلار 2 التىنمەن بۇكىل ەلدى قۋانتتى. قۇراما ساپىنداعى دايانا ابدىربەكوۆا مەن الينا ءادىلحانوۆا – شىمكەنت قالاسىنىڭ كوركەم گيمناستيكا سپورت مەكتەبىنىڭ شاكىرتتەرى.
ەسكەك ەسۋدەن يننا كلينوۆا دا التىن جۇلدەنى قورجىنعا سالدى. سونداي-اق، سەۆارا نىشانباەۆا (دزيۋدو), ەلمير ءالىمجانوۆ (سەمسەرلەسۋ), دانيار يۋلداشەۆ (كاراتە), ماريا دميتريەنكو (ستەند اتۋ), پيرمامماد اليەۆ (باتۋتتا سەكىرۋ), دميتري كوبلوۆ (جەڭىل اتلەتيكا), ەرسۇلتان مۇزاپپاروۆ (بەلبەۋ كۇرەسى) سىندى سپورتشىلار قولا جۇلدە جەڭىپ الدى.
شىمكەنت قالاسىنىڭ كوركەم گيمناستيكا سپورت مەكتەبىنىڭ ۇجىمى جەڭىمپاز سپورتشىلاردى شىمكەنت اۋەجايىنان زور قوشەمەتپەن قارسى الدى.
ازيا ويىندارىندا ۇلتتىق قۇرامانىڭ باس باپكەرى ءاليا يۋسۋپوۆا شاكىرتتەرىنە زور سەنىم ارتقان ەدى. سەنىم اقتالدى - قازاق قىزدارى ازيا ويىندارىنىڭ جەڭىمپازى! جەكەلەي سىندا دا، كوماندالىق سايىستا دا.
ءتىل-كوزىمىز تاسقا، وتاندىق كوركەم گيمناسشىلارىمىزدىڭ ونەرى ازىرگە قۋانتادى. وزگەلەرگە ەسەمىز كەتە قويعان جوق. گۋانجوۋدا دا ءوز بيىگىمىزدەن تۇسكەن جوقپىز. بەيجىڭ ويىندارىنان كەيىن سپورتتىق عۇمىرىن اياقتاعان ءاليا يۋسۋپوۆانىڭ لايىقتى ءىزباسارلارى بار ەكەنىنە كوڭىل توعايدى، ارينە.
يۋسۋپوۆانىڭ ورنىن جوقتاتپاعان اننا اليابەۆا گۋانجوۋ دوداسىن جەڭىسپەن اياقتادى. جەكەلەي سىندا وزبەكستاندىق ۋليانا تروفيموۆا، كورەيالىق سونگ ەن جاەنى دە سوڭىندا قالدىرىپ، مارەگە ءبىرىنشى بولىپ كەلدى. مۇنان بولەك كوماندالىق سايىستا دا ءبىزدىڭ باعىمىز جاندى. مادينا مۇقانوۆا، اننا اليابەۆا، ميزانا يسمايلوۆا، مارينا پەتراكوۆا وكشەلەي قۋعان وزبەك، جاپون قىزدارىن دا ارتتا قالدىردى. ءسويتىپ، دوحاداعى جەڭىسىمىزدى قايتالاپ، تاعى دا جالپى ەسەپتە ءبىرىنشى ورىنعا شىقتىق.
راس، جەڭىستى جولىمىز ۇزىلمەك ەمەس. مۇنى كوركەم گيمناسشىلارىمىز دجاكارتا تورىندە دالەلدەپ بەردى. الينا ءادىلحانوۆا، دايانا ابدىربەكوۆا، اديليا تىلەكەنوۆا كوماندالىق سايىستا جەڭىمپاز اتاندى. ال الينا ءادىلحانوۆا جەكەلەي كوپسايىستا دا چەمپيون بولدى. وسىلايشا ەكى التىن جۇلدە دە ءبىزدىڭ ەنشىمىزگە ءتيدى. كوماندالىق سايىستا وزبەكستان – 2, وڭتۇستىك كورەيا ءۇشىنشى ورىننان كورىندى. جاپونيا، قىتاي، كحدر ارۋلارى ارتتا قالدى. جەكەلەي سايىستا الينا ءادىلحانوۆا 66.800 ۇپايعا يە بولدى. وزبەكستاندىق ءسابينا تاشكەنباەۆا 65.850, قىتاي ەلىنىڭ سپورتشىسى جاو يايتينگ 65.550 ۇپاي جينادى.
جالپى ەسەپتە دە قازاقستان قۇراماسى ۇزدىك شىقتى. جەڭىس جەڭىسكە ۇلاسا بەرگەي! ەندىگى ماقسات – 2020 جىلعى توكيو ويىندارى. ال ءبىز ارۋلارىمىزعا ساتتىلىك تىلەيمىز!
