Eki aptaǵa sozylǵan Jazǵy Azııa oıyndary máresine jetti. Úmit pen kúdik arpalysqan dodada el sportshylary da jarys kórigin qyzdyrdy. Jalpy, elimizdiń atynan 404 sportshy 25 olımpıadalyq sport túrinen baq synady. Dúbirli dodada otandastarymyz aıanyp qalǵan joq. Degenmen, áttegen-aı deıtin jaǵdaılar da boldy. Jalpy komandalyq esepte bizge buıyrǵany - 9-oryn.
40172288 1921865714528358 4628077709572964352 n
Baıraqty básekede Qytaı sportshylary 132 altyn, 92 kúmis, 65 qola (jalpy 289 medal) júldemen talassyz ozdy. Ekinshi orynǵa 75 altyn, 56 kúmis, 74 qola júldesi bar Japonııa eli jaıǵasty. Úzdik úshinshi oryndy túıindegen Koreıa quramasy 49 altyn, 58 kúmis, 70 qola júlde jeńip aldy. Jarysty uıymdastyrýshy Indonezııa sportshylary tórtinshi orynǵa turaqtady: qorjynda 31 altyn, 24 kúmis, 43 qolasy bar.
Al Qazaq eliniń sportshylary 15 altyn, 17 kúmis, 44 qola, jalpy 76 medal enshilep, 9-orynǵa qanaǵat ettik. Djakartada negizinen velosport (2 altyn), djıý djıtsý (2 altyn), kórkem gımnastıka (2 altyn), sambo (2 altyn) sheberleri úzdik nátıjege jetti.
Qala sportshylarynyń qorjynynda – 12 júlde
40355664 2134891983393610 2741229676574801920 n1
Tórt jylda bir keletin dodaǵa Shymkent qalasynan 36 sportshy attanǵan edi. Órenderimiz 12 júldemen oraldy: 3 altyn, 3 kúmis, 6 qola júlde. Ásirese, kórkem gımnasshylar 2 altynmen búkil eldi qýantty. Qurama sapyndaǵy Daıana Ábdirbekova men Alına Ádilhanova – Shymkent qalasynyń kórkem gımnastıka sport mektebiniń shákirtteri.
Eskek esýden Inna Klınova da altyn júldeni qorjynǵa saldy. Sondaı-aq, Sevara Nyshanbaeva (dzıýdo), Elmır Álimjanov (semserlesý), Danııar Iýldashev (karate), Marııa Dmıtrıenko (stend atý), Pırmammad Alıev (batýtta sekirý), Dmıtrıı Koblov (jeńil atletıka), Ersultan Muzapparov (belbeý kúresi) syndy sportshylar qola júlde jeńip aldy.
Shymkent qalasynyń kórkem gımnastıka sport mektebiniń ujymy jeńimpaz sportshylardy Shymkent áýejaıynan zor qoshemetpen qarsy aldy.
Azııa oıyndarynda ulttyq quramanyń bas bapkeri Álııa Iýsýpova shákirtterine zor senim artqan edi. Senim aqtaldy - Qazaq qyzdary Azııa oıyndarynyń jeńimpazy! Jekeleı synda da, komandalyq saıysta da.
Til-kózimiz tasqa, otandyq kórkem gımnasshylarymyzdyń óneri ázirge qýantady. Ózgelerge esemiz kete qoıǵan joq. Gýanjoýda da óz bıigimizden túsken joqpyz. Beıjiń oıyndarynan keıin sporttyq ǵumyryn aıaqtaǵan Álııa Iýsýpovanyń laıyqty izbasarlary bar ekenine kóńil toǵaıdy, árıne.
Iýsýpovanyń ornyn joqtatpaǵan Anna Alıabeva Gýanjoý dodasyn jeńispen aıaqtady. Jekeleı synda ózbekstandyq Ýlıana Trofımova, koreıalyq Song En Jaeni de sońynda qaldyryp, márege birinshi bolyp keldi. Munan bólek komandalyq saıysta da bizdiń baǵymyz jandy. Madına Muqanova, Anna Alıabeva, Mızana Ismaılova, Marına Petrakova óksheleı qýǵan ózbek, japon qyzdaryn da artta qaldyrdy. Sóıtip, Dohadaǵy jeńisimizdi qaıtalap, taǵy da jalpy esepte birinshi orynǵa shyqtyq.
Ras, jeńisti jolymyz úzilmek emes. Muny kórkem gımnasshylarymyz Djakarta tórinde dáleldep berdi. Alına Ádilhanova, Daıana Ábdirbekova, Adılıa Tilekenova komandalyq saıysta jeńimpaz atandy. Al Alına Ádilhanova jekeleı kópsaıysta da chempıon boldy. Osylaısha eki altyn júlde de bizdiń enshimizge tıdi. Komandalyq saıysta Ózbekstan – 2, Ońtústik Koreıa úshinshi orynnan kórindi. Japonııa, Qytaı, KHDR arýlary artta qaldy. Jekeleı saıysta Alına Ádilhanova 66.800 upaıǵa ıe boldy. Ózbekstandyq Sábına Tashkenbaeva 65.850, Qytaı eliniń sportshysy Jao Iaıtıng 65.550 upaı jınady.
Jalpy esepte de Qazaqstan quramasy úzdik shyqty. Jeńis jeńiske ulasa bergeı! Endigi maqsat – 2020 jylǵy Tokıo oıyndary. Al biz arýlarymyzǵa sáttilik tileımiz!
