شىمكەنتتە جاسى 18-دەن اسقان مۇگەدەكتىگى بار جاندارعا ارنالعان ورتالىقتىڭ رەسمي اشىلۋ سالتاناتى بولدى. «راقمەت، ساعان، اناشىم» ورتالىعىنىڭ جەتەكشىلەرى مەن جاسوسپىرىمدەر قوناقتارعا داستارحان جايىپ، ءوز ونەرلەرىن كورسەتتى. ءىس-شاراعا «شىمكەنت قالاسىنىڭ ازاماتتىق اليانسىنىڭ» توراعاسى جۇماعالي بىلىسبەكوۆ، ءتۇرلى قوعامدىق ۇيىمداردىڭ جەتەكشىلەرى، ءانشى زاتتىبەك كوپبولسىنۇلى، جەتكىنشەكتەر مەن ولاردىڭ اتا-انالارى قاتىستى.
– ەرەكشە كۇتىمدى قاجەت ەتەتىن بالالار قوعامعا ەتەنە ارالاسۋى كەرەك. باسقا دا جەرلەستەرىمىز وسىنداي ورتالىقتاردىڭ بار ەكەنىن ءبىلۋى باعىتىنداعى جۇمىستارىڭىزعا ازاماتتىق اليانس تاراپىنان قولداۋ كورسەتەمىز. ورتالىق جۇمىسىنا تەك ساتتىلىك، ال اتا-انالارعا توزىمدىلىك پەن دەنساۋلىق تىلەيمىز! – دەدى جۇماعالي داۋلەتبەكۇلى.
«راقمەت، ساعان، اناشىم» قوعامدىق قورىنىڭ ءتورايىمى كەنجەتاەۆا الماگۇلدىڭ ايتۋىنشا، قور 2017 جىلدان بەرى جۇمىس ىستەپ كەلەدى. ال جاقىندا قالالىق اكىمدىكتىڭ، دەمەۋشىلەر مەن قامقور جانداردىڭ قولداۋىمەن وسى عيمارات جوندەلگەن. ورتالىق جاسى 18-دەن اسقان 12 ادامعا لايىقتالعان. ترەناجەر قۇرالدارى مەن دەمالاتىن بولمەلەرى بار. مۇمكىندىگى شەكتەۋلى جانداردى اتا-انالارى ورتالىققا تاڭەرتەڭ الىپ كەلىپ، كەشكە الىپ قايتادى. مۇنداي جاندار ورتالىققا جۇمىسپەن قامتۋ جانە الەۋمەتتىك باعدارلامالار باسقارماسىنىڭ جولداماسىمەن كەلەدى.
