Shymkentte jasy 18-den asqan múgedektigi bar jandarǵa arnalǵan ortalyqtyń resmı ashylý saltanaty boldy. «Raqmet, saǵan, Anashym» ortalyǵynyń jetekshileri men jasóspirimder qonaqtarǵa dastarhan jaıyp, óz ónerlerin kórsetti. Is-sharaǵa «Shymkent qalasynyń Azamattyq Alıansynyń» tóraǵasy Jumaǵalı Bilisbekov, túrli qoǵamdyq uıymdardyń jetekshileri, ánshi Zattybek Kópbolsynuly, jetkinshekter men olardyń ata-analary qatysty.
– Erekshe kútimdi qajet etetin balalar qoǵamǵa etene aralasýy kerek. Basqa da jerlesterimiz osyndaı ortalyqtardyń bar ekenin bilýi baǵytyndaǵy jumystaryńyzǵa Azamattyq Alıans tarapynan qoldaý kórsetemiz. Ortalyq jumysyna tek sáttilik, al ata-analarǵa tózimdilik pen densaýlyq tileımiz! – dedi Jumaǵalı Dáýletbekuly.
«Raqmet, saǵan, Anashym» qoǵamdyq qorynyń tóraıymy Kenjetaeva Almagúldiń aıtýynsha, qor 2017 jyldan beri jumys istep keledi. Al jaqynda qalalyq ákimdiktiń, demeýshiler men qamqor jandardyń qoldaýymen osy ǵımarat jóndelgen. Ortalyq jasy 18-den asqan 12 adamǵa laıyqtalǵan. Trenajer quraldary men demalatyn bólmeleri bar. Múmkindigi shekteýli jandardy ata-analary ortalyqqa tańerteń alyp kelip, keshke alyp qaıtady. Mundaı jandar ortalyqqa Jumyspen qamtý jáne áleýmettik baǵdarlamalar basqarmasynyń joldamasymen keledi.
