قالالىق قان ورتالىعىنا بۇل جولى توتەنشە جاعدايلار دەپارتامەنتىنىڭ قىزمەتكەرلەرى، مادەنيەت سالاسىنىڭ ونەرپازدارى، سپورتشىلار، مۇعالىمدەر، رۋحاني جاڭعىرۋ ورتالىعىنىڭ ماماندارى، جوعارى جانە ورتا ارناۋلى وقۋ ورىندارىنىڭ ستۋدەنتتەرى، ۆولونتەرلەر جانە بەلسەندى جاستار، جالپى سانى 100-گە جۋىق ادام قان تاپسىرۋعا جينالدى. ونىڭ ىشىندە تالاپقا ساي كەلگەن 30-دان استام ادام قان تاپسىرىپ، قان قۇيۋدى قاجەت ەتەتىن ناۋقاستارعا كومەكتەستى.
– جاڭا وقۋ جىلىن يگى ىسپەن باستاۋدى ءجون كورىپ، جاستاردى ونىڭ ىشىندە ستۋدەنتتەردى دونورلىق اكتسياعا شاقىرىپ وتىرمىز. جوعارى جانە ارناۋلى وقۋ ورىندارىنىڭ شاكىرتتەرىمەن قاتار، 10-عا جۋىق مەكەمە قىزمەتكەرلەرى بۇگىنگى اكتسيادا بەلسەندىلىك تانىتۋدا. ءار ءۇش ايدا وسى يگى شارا جالعاسىن تابادى. ورتالىعىمىزدىڭ بىرقاتار قىزمەتكەرى دونور رەتىندە قان تاپسىرۋدى ادەتكە اينالدىرعان. باستى ماقسات – كومەك قولىن سوزۋ، - دەيدى جاستار رەسۋرستىق ورتالىعىنىڭ ديرەكتورى
ەرلان ايتباەۆ.
ايتا كەتەيىك، دەننىڭ ساۋلىعىمەن قوسا قان تاپسىرۋ ءۇشىن بىرنەشە تالاپتار بەكىتىلگەن. قان تاپسىرۋعا 18 جاسقا تولعان، سالماعى 55 كەلىدەن اساتىن دەنساۋلىعىندا كىناراتى جوق ءار ادام دونور بولا الادى. سونىمەن قاتار، 48 ساعات بۇرىن ءدارى-دارمەكتەر مەن الكوگولدى ونىمدەردى قابىلداماۋ جانە مۇمكىندىگىنشە تەمەكى شەكپەۋ كەرەك.
