قازىرگى تاڭدا شىمكەنت قالاسىندا تۇرعىن ءۇي الۋ تىزىمىندە ءتۇرلى ساناتتار بويىنشا 46 426 ازامات تىركەلگەن. جىل سايىن كەزەكتە تۇرعان ازاماتتارعا پاتەرلەر بەلگىلەنگەن تارتىپپەن ۇلەستىرىلىپ كەلەدى. ارەندالىق تۇرعىن ۇيلەر كوپبالالى وتباسىلارعا، حالىقتىڭ الەۋمەتتىك جاعىنان ءالسىز توپتارىنا جانە جۇمىس ىستەيتىن جاستارعا قاراستىرىلعان. ال، بيۋدجەتتىك ۇيىم قىزمەتكەرلەرىنە «نۇرلى جەر» مەملەكەتتىك تۇرعىن ءۇي باعدارلاماسى اياسىندا جەڭىلدەتىلگەن نەسيەلىك باعدارلامالارى ۇسىنىلۋدا.
ازاماتتاردىڭ باسپانا ماسەلەسىن شەشۋ جولدارى بۇگىن قالا اكىمىنىڭ ورىنباسارى ەرعالي بىلىسبەكوۆتىڭ تۇرعىنداردى ونلاين قابىلداۋىندا دا قاراستىرىلدى. قالا باسشىسىنىڭ ورىنباسارى ءار تۇرعىننىڭ ءوتىنىش-تالاپتارىن مۇقيات تىڭداپ، زاڭ اياسىندا شەشۋ جولدارىن ءتۇسىندىردى. ەرعالي داۋلەتبەكۇلىنىڭ ايتۋىنشا، باسپاناعا مۇقتاج ازاماتتاردى قولداۋ رەتىندە بيىل جەرگىلىكتى بيۋدجەت ەسەبىنەن تۇرعىن ءۇي سەريتيفيكاتىنا 500 ميلليون تەڭگە ءبولىنىپ وتىر. نەسيەلىك باعىتتا باسپانا الۋعا نيەت بىلدىرگەندەرگە قايتارىمسىز نەگىزدە باستاپقى جارناعا 1 ميلليون تەڭگەدەن بەرىلۋدە. بۇگىندە 132 ازامات تۇرعىن ءۇي سەرتيفيكاتىن الىپ ۇلگەرگەن. وتىنىمدەردى قابىلداۋ 1 قازاننان باستاپ قايتا باستالادى. ازاماتتاردىڭ قۇجاتتارىن ونلاين قابىلداۋ «www.kezekte.kz» سايتى ارقىلى جۇزەگە اسىرىلادى.
اي سايىنعى اقىسىن تولەپ تۇراتىن جالدامالى پاتەرگە قاراعاندا نەسيەگە الىنعان باسپانا ازاماتتىڭ ءوز مۇلكى بولاتىندىعىن اتاپ ءوتۋ قاجەت. ماسەلەن، قالالىق تۇرعىن ءۇي باسقارماسىنىڭ مالىمەتىنشە، جىل باسىنان بەرى «وتباسى بانك» ارقىلى كرەديتتىك تۇرعىن ۇيمەن («5-20-25»باعىتى بويىنشا) 729 ازامات قامتىلعان بولسا، ونىڭ 261-ءى تۇرعىن ءۇي كەزەگىندە تىركەلگەندەر.
جىل باسىنان سونداي-اق، «7-20-25» باعدارلاماسى بويىنشا شىمكەنت قالاسىنداعى ەكىنشى دەڭگەيلى بانكتەر ارقىلى 1362 ازامات العاشقى تۇرعىن ءۇيدى نارىقتان نەسيە راسىمدەپ ساتىپ العان. «2-10-20 - باقىتتى وتباسى» باعدارلاماسى بويىنشا 158 وتباسى تۇرعىن جايمەن قامتاماسىز ەتىلگەن.
جىل سوڭىنا دەيىن 7-20-25, 5-10-20 (شاڭىراق), 5-20-25, 2-10-20 (باقىتتى وتباسى) جەڭىلدەتىلگەن كرەديتتىك تۇرعىن ۇيلەرمەن – 4 413 وتباسىنى قامتۋ جوسپارلانۋدا.
