Qazirgi tańda Shymkent qalasynda turǵyn úı alý tiziminde túrli sanattar boıynsha 46 426 azamat tirkelgen. Jyl saıyn kezekte turǵan azamattarǵa páterler belgilengen tártippen úlestirilip keledi. Arendalyq turǵyn úıler kópbalaly otbasylarǵa, halyqtyń áleýmettik jaǵynan álsiz toptaryna jáne jumys isteıtin jastarǵa qarastyrylǵan. Al, bıýdjettik uıym qyzmetkerlerine «Nurly jer» memlekettik turǵyn úı baǵdarlamasy aıasynda jeńildetilgen nesıelik baǵdarlamalary usynylýda.
Azamattardyń baspana máselesin sheshý joldary búgin qala ákiminiń orynbasary Erǵalı Bilisbekovtyń turǵyndardy onlaın qabyldaýynda da qarastyryldy. Qala basshysynyń orynbasary ár turǵynnyń ótinish-talaptaryn muqııat tyńdap, zań aıasynda sheshý joldaryn túsindirdi. Erǵalı Dáýletbekulynyń aıtýynsha, baspanaǵa muqtaj azamattardy qoldaý retinde bıyl jergilikti bıýdjet esebinen turǵyn úı serıtıfıkatyna 500 mıllıon teńge bólinip otyr. Nesıelik baǵytta baspana alýǵa nıet bildirgenderge qaıtarymsyz negizde bastapqy jarnaǵa 1 mıllıon teńgeden berilýde. Búginde 132 azamat turǵyn úı sertıfıkatyn alyp úlgergen. Ótinimderdi qabyldaý 1 qazannan bastap qaıta bastalady. Azamattardyń qujattaryn onlaın qabyldaý «www.kezekte.kz» saıty arqyly júzege asyrylady.
Aı saıynǵy aqysyn tólep turatyn jaldamaly páterge qaraǵanda nesıege alynǵan baspana azamattyń óz múlki bolatyndyǵyn atap ótý qajet. Máselen, qalalyq turǵyn úı basqarmasynyń málimetinshe, jyl basynan beri «Otbasy bank» arqyly kredıttik turǵyn úımen («5-20-25»baǵyty boıynsha) 729 azamat qamtylǵan bolsa, onyń 261-i turǵyn úı kezeginde tirkelgender.
Jyl basynan sondaı-aq, «7-20-25» baǵdarlamasy boıynsha Shymkent qalasyndaǵy ekinshi deńgeıli bankter arqyly 1362 azamat alǵashqy turǵyn úıdi naryqtan nesıe rásimdep satyp alǵan. «2-10-20 - Baqytty otbasy» baǵdarlamasy boıynsha 158 otbasy turǵyn jaımen qamtamasyz etilgen.
Jyl sońyna deıin 7-20-25, 5-10-20 (Shańyraq), 5-20-25, 2-10-20 (Baqytty otbasy) jeńildetilgen kredıttik turǵyn úılermen – 4 413 otbasyny qamtý josparlanýda.
