ەل تاۋەلسىزدىگىنىڭ 30 جىلدىعى قارساڭىندا شىمكەنت قالاسىنىڭ ورتالىقتاندىرىلعان كوپشىلىك كىتاپحانالار جۇيەسىنىڭ №2 جانە №5 كىتاپحانا بولىمشەلەرى جاڭعىرتىلىپ، بۇگىن وقىرماندارىنا ەسىگىن ايقارا اشتى. جاڭعىرتىلعان بولىمشەلەر بەلگىلى ءبىر تاقىرىپقا باعىتتالعان. ماسەلەن، №2 بولىمشە مادەنيەت، ونەر سالاسىنا ارنالسا، №5 بولىمشە اباي شىعارماشىلىعىن نەگىزگە العان.
سالتاناتتى شاراعا شىمكەنت قالاسى اكىمىنىڭ ءبىرىنشى ورىنباسارى ش.مۇقان، شىمكەنت قالالىق ءماسليحاتىنىڭ حاتشىسى ب.نارىمبەتوۆ، «اۋىل» سوتسيال-دەموكراتيالىق پارياسى شىمكەنت قالالىق فيليالىنىڭ توراعاسى ق. دوساليەۆ، كومپوزيتور ش. قالداياقوۆتىڭ قارىنداسى رايحان قالداياقوۆا، شىمكەنت قالاسىنىڭ مادەنيەت، تىلدەردى دامىتۋ جانە ارحيۆتەر باسقارماسىنىڭ باسشىسى ح. ەسەنوۆا جانە قالالىق ءماسليحاتتىڭ دەپۋتاتتارى قاتىستى. جيىنعا كەلۋشىلەر قازاق ءۆالسىنىڭ كورولى ش.قالداياقوۆتىڭ ەسكەرتكىشىنە گۇل شوقتارىن قويىپ، كىتاپحانانى ارالادى.
— وتكەن جىلى قالا اكىمى م.ايتەنوۆ ش.قالداياقوۆتىڭ 90 جىلدىعىندا ەسكەرتكىشكە گۇل شوقتارىن قويىپ، كىتاپحانانى ارالاعان ەدى. كىتاپ قورى باي بولسا دا، توزىعى جەتكەن عيماراتتى كورىپ، جاڭعىرتۋ جۇمىستارىن جۇرگىزۋدى تاپسىردى. مىنە، مەملەكەتتىڭ قولداۋىمەن، ەل تاۋەلسىزدىگىنىڭ 30 جىلدىعى قارساڭىندا كىتاپحانا جۇمىسى جاندانىپ، جاڭعىرتىلىپ وتىر. ەندى وقىرمان كوبەيسىن دەپ تىلەيمىز،- دەدى ش.مۇقان.
بۇل نىساندار «وتباسىلىق كىتاپحانا» كونتسەپتسياسى بويىنشا زاماناۋي ۇلگىدە جاڭعىرتىلعان. كىتاپحانانىڭ وقۋ زالىنداعى كىتاپتار «جاڭا توپتاما»، «ونەر الەمىنە ساياحات»، «وقۋعا ءتيىس 10 كىتاپ»، «ۇلى ەسىمدەر» دەگەن بىرنەشە تاقىرىپ اياسىندا توپتاستىرىلعان. سونداي-اق، كوركەم ادەبيەت بولىمىندە الەم ادەبيەتى مەن قازاق ادەبيەتىنىڭ كلاسسيكتەرىنىڭ تۋىندىلارى توپتاستىرىلسا، 10 مىڭعا جۋىق سيرەك كىتاپ التىن قورعا قويىلعان.
شىمكەنت قالالىق ورتالىقتاندىرىلعان كوپشىلىك كىتاپحانالار جۇيەسىنىڭ ديرەكتورى ن.جۇمانوۆانىڭ ايتۋىنشا، كىتاپحانانىڭ كىتاپ قورى 27 مىڭعا جۋىق. ەندى بۇل تەك كىتاپ وقىلاتىن جەر ەمەس، سونىمەن قاتار قوعامدىق ورىنعا اينالماق. مۇندا تۇرعىنداردىڭ وتباسىمەن بىرگە كەلىپ، ۋاقىتىن ءتيىمدى وتكىزۋىنە دە بارلىق مۇمكىندىك جاسالعان.
زاميرا الدابەرگەنوۆا
فوتو: سەرىك قوساەۆ
