شىمكەنتتەگى قالالىق №1 كلينيكالىق اۋرۋحاناسىندا تاۋەلسىزدىك مەكەرەسى قارساڭىندا اقش-تان اكەلىنگەن كومپيۋتەرلىك توموگرافيا قۇرىلعىسى ىسكە قوسىلدى.
ەم-دوم كورسەتۋ مەكەمەسىندە اشىلعان كومپيۋتەرلىك توموگرافيا كابينەتىمەن تانىسقان شاھاردىڭ باس دارىگەرى باقىتجان پوزيلوۆ اپپارات ينسۋلت العان ناۋقاستىڭ دياگنوزىن دەر كەزىندە انىقتاۋعا مۇمكىندىك بەرەتىنىن جەتكىزدى.
– بۇل جەكە ينۆەستوردىڭ ەسەبىنەن الىنعان قۇرىلعى. قالاداعى مەديتسينالىق ورتالىقتاردا 21 كومپيۋتەرلىك توموگرافيا بولعان. كوبى جەكەمەنشىك مەدورتالىقتاردا ورنالاسقان. ال جاڭا اپپارات سوڭعى ۇلگىدەگى تەحنولوگيامەن جابدىقتالعان. قالالىق №1 كلينيكالىق اۋرۋحاناسىنا تاۋلىگىنە ورتاشا ەسەپپەن 200-گە جۋىق ناۋقاس تۇسەدى. كەيدە جەدەل مەديتسينالىق كومەككە جۇگىنگەن ناۋقاستارعا زەرتتەۋ جۇرگىزۋدە اتالعان قۇرىلعىنىڭ پايداسى زور. اسىرەسە، يشەميالىق ينسۋلت العان ناۋقاستىڭ دياگنوزىن دەر كەزىندە انىقتاۋعا سەپتىگىن تيگىزەدى. ەل تاۋەلسىزدىگىنىڭ 30 جىلدىق مەرەكەسىندە وسىنداي قۇرىلعى ەل يگىلىگىنە بەرىلىپ وتىر. اۋرۋحاناعا كەلگەن ناۋقاستار كومپيۋتەرلىك توموگرافياعا تەگىن تۇسىرىلەدى، - دەدى باقىتجان جولداسبەكۇلى.
جالپى، كومپيۋتەرلىك توموگرافيا اعزانىڭ بارلىق مۇشەلەرى مەن جۇيەلەرىنە زەرتتەۋ جۇرگىزۋگە مۇمكىندىك بەرەدى. قاراما-قارسى تۇستەردى قولدانىپ، باعدارلامانىڭ ارنايى پاكەتتەرىن قوسۋ ارقىلى جۇرەك قان تامىرلارىنىڭ زاقىمدانۋ دەڭگەيىن بايقاۋعا، سۇيەك تىندەرىنىڭ مينەرالدى تىعىزدىعىن انىقتاۋعا جاعداي جاسايدى.
ازامات جاپپار،
فوتو سەرىك قوساەۆ
