شىمكەنتتە «بەلسەندى ۇزاق ءومىر ءسۇرۋ ورتالىعىنىڭ» زەينەتكەرلەرى سالاۋاتتى ءومىر سالتىن ناسيحاتتاۋعا جاڭا سەرپىن بەرۋدە. اپتا سايىن قاريالار دەندروساياباقتا سپورتپەن شۇعىلدانىپ ۋاقىتتارىن پايدالى ءارى كوڭىلدى وتكىزەدى. بۇگىندە ورتالىقتا 445 زەينەتكەرىمىز ءتۇرلى قىزمەت تۇرلەرىن الۋدا.
شىمكەنتتە قارقىندى جۇزەگە اسىپ جاتقان «بەلسەندى ۇزاق ءومىر ءسۇرۋ» ورتالىعى زەينەتكەرلەرىمىزدىڭ بوس ۋاقىتىن ءتيىمدى وتكىزۋ ءۇشىن جانە سالاۋاتتى ءومىر سۇرۋگە شاقىرىپ، ومىرگە دەگەن قۇشتارلىقتارىن ارتتىرۋ ماقساتىندا قىزمەت اتقارادى. ەگدە جاستاعى قاريالارىمىز شەت ءتىلىن دە مەڭگەرىپ ءجۇر. ودان بولەك، قولونەرمەن اينالىسىپ، ورتالىقتىڭ كىتاپحاناسىندا سۇيىكتى كىتاپتارىن وقۋمەن وتكىزەدى.
- جۇمىسپەن قامتۋ جانە الەۋمەتتىك قورعاۋ باسقارماسىنا قاراستى «بەلسەندى ۇزاق ءومىر ورتالىعىندا» شىمكەنت قالاسىنداعى زەينەت جاسىنا جەتكەن تۇرعىنداردى قابىلدايدى. ەشقانداي شەكتەۋ جوق. قىزمەت الۋشىلار العاشقى ورتالىققا كەلگەندە مىندەتتى تۇردە دارىگەرلىك تەكسەرۋدەن (تەراپەۆت، كارديولوگ، نەۆروپاتولوگ، فيزيوتەراپەۆت) وتەدى. اپتا سايىن دەندروساياباققا بارىپ دەنە شىنىقتىرۋمەن جانە يوگامەن اينالىسادى. سونىمەن قاتار ماسساج، فيزيوتەراپيا، فيتوبار، تۇزدى كەنىشى جانە ت.ب. قىزمەت تۇرلەرىن كورسەتەدى،-دەيدى باسقارما باسشىسى بالمارجان ناربەكوۆا
ايتا كەتەيىك، شىمكەنت قالاسى بويىنشا زەينەتكەرلەر سانى 82 603. «اسىل جۇرەك» بەلسەندى ۇزاق ءومىر ءسۇرۋ ورتالىعى جايىندا تولىق اقپارات الۋ ءۇشىن 8 (7252) 53-02-08 تەلەفونىنا حابارلاسۋعا بولادى.
