تاۋەلسىزدىگىمىزدىڭ 30 جىلدىعى قارساڭىندا شىمكەنتتە جەرگىلىكتى تاۋار وندىرۋشىلەر شىعاراتىن ءونىم تۇرلەرىنىڭ كورمەسى اشىلدى. قالا ەكونوميكاسىنىڭ تىرەگى سانالاتىن 100-گە جۋىق كاسىپورىن «شىمكەنت ونىمدەرى» تاقىرىبىمەن الداعى ءۇش كۇن كولەمىندە جالعاساتىن كورمەگە ءوز تاۋارلارىن ۇسىندى.
تاۋەلسىزدىك جىلدارىندا شىمكەنت قالاسىنىڭ ەكونوميكاسى تۇرلەندى. قالامىزدا قۇرىلىس يندۋسترياسى، ماشينا جاساۋ، مۇناي-حيميا، جەڭىل ونەركاسىپ، تاماق ءوندىرىسى، تەكستيل ونەركاسىبى، فارماتسەۆتيكا، اۋىل شارۋاشىلىعى ونىمدەرىن تەرەڭ وڭدەۋ، تاعى باسقا وندىرىستىك سالالار قالىپتاستى.
كورمەنىڭ اشىلۋ راسىمىنە قالا اكىمى مۇرات ايتەنوۆ قاتىسىپ، قالا كاسىپورىندارى شىعاراتىن ءونىم تۇرلەرىمەن تانىستى.
«مەملەكەت باسشىسى بيىلعى جولداۋىندا ەكونوميكانى ءارتاراپتاندىرۋ، وندىرىلەتىن تاۋارلاردىڭ ءتۇرىن كوبەيتىپ، ەكسپورت گەوگرافياسىن كەڭەيتۋ جونىندە ناقتى تاپسىرمالار بەردى. وڭدەۋ ونەركاسىبىنىڭ ەكسپورتىن كوبەيتۋ، ەڭبەك ونىمدىلىگىن ارتتىرۋ ناتيجەسىندە قالامىزدىڭ ونەركاسىپ كولەمى جىل اياعىنا دەيىن 711,5 ملرد. تەڭگەگە جەتەدى، وندىرىلگەن ءونىمنىڭ 87 پايىزىن وڭدەۋ ونەركاسىبى قۇرايدى. قالاداعى 4 وندىرىستىك ايماقتا 118 جوبا جۇزەگە اسىپ، 21 مىڭعا جۋىق جۇمىس ورىندارى اشىلدى. بيىلعى جىلدىڭ وزىندە جاڭادان 5 جوبا جۇزەگە اسىپ، 203 جۇمىس ورنى اشىلدى»، - دەپ اتاپ ءوتتى شاھار باسشىسى.
قالانىڭ وندىرىستىك الەۋەتىن ارتتىرۋدا جاڭادان 2 يندۋستريالدى ايماقتىڭ قۇرىلىسى باستالعان. ونىڭ ىشىندە «جۇلدىز» يدۋستريالدى ايماعىندا قۇرىلىس، مەتاللۋرگيا، فارماتسەۆتيكا، جيھاز ونەركاسىبى شوعىرلاناتىن بولادى. «ستاندارت» جەكە يندۋستريالدى ايماعى شاعىن جانە ورتا كاسىپكەرلىك سۋبەكتىلەرىنىڭ وندىرىستىك الاڭى رەتىندە قىزمەت كورسەتپەك. مۇندا زاماناۋي قويمالار، شاعىن وندىرىستىك تسەحتار اشىلاتىن بولادى.
تاماق ءوندىرىسى سالاسىندا اۋىلشارۋاشىلىق ونىمدەرىن تەرەڭ وڭدەۋگە باسىمدىق بەرىلدى. بۇل باعىتتا «بوزارىق» تاماق ونەركاسىبى ايماعىنىڭ ينجەنەرلىك جۇيەلەرى جۇرگىزىلۋدە. مۇندا 23 ملرد.تەڭگەنى قۇرايتىن 1 800 جۇمىس ورنىمەن 20-دان استام جوبا ىسكە اسىرىلادى. قوسىمشا 198 گەكتار جەرگە اگرويندۋستريالدى ايماق قۇرۋ جوسپارلاندى. مۇندا ونەركاسىپتىك جىلىجاي كەشەندەرى سالىنادى.
قالالىق ورتا بولۋىمىزعا قاراماستان، اۋىل شارۋاشىلىعى ونىمدەرىنىڭ كولەمىن بيىل 37 ملرد. تەڭگەگە جەتكىزۋ جوسپارلانعان. بۇل جىلى جىلىجاي، قارقىندى باۋ، مال بورداقىلاۋ، ەت وڭدەۋ بويىنشا 15 ينۆەستيتسيالىق جوبا جۇزەگە استى. جىل سوڭىنا دەيىن وسى ساناتتاعى تاعى 10 جوبا ىسكە قوسىلماق. شىمكەنتتىڭ وندىرىستىك قۋاتىن قۇرايتىن بۇل جوبالار ىشكى نارىقتى وتاندىق مازمۇندى قۇرايتىن ءونىم تۇرلەرىمەن تولىقتىرىلىپ، قازاقستاننىڭ ەكسپورتتىق الەۋەتىن ارتتىرۋعا قىزمەت ەتپەك.
شىمكەنتتە شىعاتىن ونىمدەر كورمەسى الداعى ۋاقىتتا تۇراقتى تۇردە وتەتىن تانىستىرىلىمدىق سيپاتتاعى الاڭ رەتىندە قىزمەتىن جالعاستىرادى. ونىڭ اياسىندا دايىن ونىمدەردى وتكىزۋ نارىعىن قاراستىرۋ، ەكسپورتقا بەيىمدەلگەن تاۋار تۇرلەرىن ىلگەرىلەتۋگە مۇمكىندىكتەر اشۋ، شىعارىلعان ونىمدەردىڭ ست-KZ وتاندىق ساپا ستاندارتى تالاپتارىنا ساي بولۋىن ۇيىمداستىرۋ، ىسكەرلىك بايلانىستاردى ارتتىرۋ مىندەتتەرى بويىنشا جۇمىستار جۇرگىزىلەدى.
