تىڭنان تۇرەن سالىپ، جاڭا دۇنيە جاساۋ – ايتۋعا عانا وڭاي. سونىڭ ىشىندە، الەمدىك كارتادا جاڭادان پايدا بولعان تاۋەلسىز مەملەكەتتىڭ تىزگىنىن جاۋاپكەرشىلىكپەن قولعا الۋ – اركىمنىڭ باتىلى بارىپ، جۇرەگى داۋالايتىن تاۋەكەل ەمەس. سەبەبى ونىڭ تۇبىندە تۇتاس حالىقتىڭ تاعدىرى مەن تاريحى تۇر. ول ءۇشىن ادامدا ەڭسەلى ەرىك-جىگەر، تاۋسىلماس ءتوزىم مەن ەڭبەكقورلىق، جاڭا زاماننىڭ تالابىن ءدال تۇيسىنەتىن كورەگەن كوسەمدىك، جارقىن بولاشاققا دەگەن سەنىم مەن تاۋەكەل بولۋ كەرەك.
ارينە، بۇگىندە ءبارى «كەڭەس وداعىنىڭ كۇيرەۋىنىڭ» ارقاسى دەي سالۋ جەڭىل. ونىڭ قالاي بولعانىن، سول پروتسەسسكە تىكەلەي قاتىسقاندار عانا تولىق تۇسىنەدى. سول زامانداعى كوپشىلىك ادامدار ءۇشىن ول ناعىز توقىراۋ زامان بولدى. بارلىعى ءبىر ساتتە توقتاپ قالدى. جۇمىسسىزدىق بەلەڭ الدى، اقشا جوق، بارلىق زاۋىتتار مەن فابريكالار ىستەن شىقتى. ءتىپتى بۇگىندە ۇزدىكسىز بەرىلۋى قالىپتى قۇبىلىسقا اينالعان ەلەكتر ەنەرگياسىنىڭ ءوزى ءجيى سونەتىن ەدى. تۇتاس قوعامنىڭ ەرتەڭگە دەگەن سەنىمى السىرەپ، داعدارىپ قالدى. ونىڭ ىشىندە، سول زاماندا جاستار ساناتىندا بولعان ءوزىم دە بارمىن.
سول قيىن كەزەڭدە ەگەر ەل باسشىلىعىنا نۇرسۇلتان ءابىشۇلى كەلمەگەندە، تۇڭعىش پرەزيدەنتتىڭ دارىندى قابىلەتى مەن جالىندى كۇش-جىگەرى بولماعاندا، تاۋەكەلگە بەل بۋىپ ەل تاعدىرىنا قاتىستى باتىل شەشىمدەردى قابىلداماعاندا، مەملەكەت دامۋىنىڭ ءدال بۇگىنگىدەي داڭعىل جولعا ءتۇسۋى ەكىتالاي بولار ەدى..
بۇگىندە ءبىز وزگە ەلدەرگە ۇلگى بولاتىن ەڭسەلى ەلورداسى بار، الەم مويىنداعان مەملەكەتتىك شەگاراسى بەكىگەن، ورتاق تاريح بىرىكتىرگەن الۋان ەتنوستى قازاقستاندىقتار ەكەنىمىزدى ماقتان تۇتامىز. باعىت-باعدارىمىز بەلگىلى، كەمەل كەلەشەككە دەگەن سەنىمىمىز نىق، ۇرپاقتىڭ جارقىن بولاشاعىنا دەگەن ءۇمىتىمىز ايقىن. ەڭ باستىسى، وسى جىلدار ىشىندە، اشىق اسپان تۇستەس بەيبىتشىلىك رامىزىندەي تۋىن ماقتان ەتەتىن، ەلدىڭ رۋحىن كوتەرەرى ءانۇرانىن تەبىرەنە شىرقايتىن تاۋەلسىز ەلدىڭ ەركىن ويلى ۇرپاعى قالىپتاستى. قازاقستان ەلىنىڭ بۇگىندە الەم مويىنداعان مەملەكەت بولىپ قالىپتاسىپ، دامۋدىڭ بۇگىنگى داڭعىل جولىنا ءتۇسۋىنىڭ بارلىعى دا – ەلباسىنىڭ دانا ساياساتى مەن تەرەڭ پاراساتىنىڭ ارقاسى.
بارشاڭىزدى بۇگىنگى 1 جەلتوقسان – قازاقستان رەسپۋبليكاسىنىڭ تۇڭعىش پرەزيدەنتى كۇنى مەرەكەسىمەن شىن جۇرەكتەن قۇتتىقتايمىن!
قاراپايىم حالىق قاي كەزدە دە ەلباسىنىڭ ءار باستاماسىنا قولداۋ كورسەتتى جانە تاۋەلسىز قازاقستاننىڭ بۇگىنگى ءوسىپ-وركەندەۋىنىڭ تۇبىندە ءاربىر قازاقستاندىق ۇلەسى جاتىر. سوندىقتان دا ەلدىكتىڭ بەلگىسىنە بالاناتىن بۇل مەرەكە – ءبىر تۇلعانىڭ ەمەس، تۇتاس ۇلتتىڭ، تاۋەلسىز جۇرتتىڭ ورتاق قۋانىشى. بارشاڭىزعا مەرەكە قۇتتى بولسىن! دەندەرىڭىزگە ساۋلىق، وتباسىلارىڭىزعا اماندىق، باق پەن بەرەكە، ىرىس پەن ىنتىماق تىلەيمىن!
"ادىرنا" ۇلتتىق پورتالى
