رەسمي مالىمەتكە سۇيەنسەك، ءبىر عانا تاراز قالاسىنىڭ وزىندە بىلتىر 48 ادام ءوز-وزىنە قول سالعان. ال بيىل 43 دەرەك ءتىركەلگەن. ونىڭ 36-سى — ەر ادام دەپ حابارلايدى "ادىرنا" ۇلتتىق پورتالى "alashainasy.kz" سايتىنا سىلتەمە جاساپ.
مامانداردىڭ ايتۋىنشا، ادامنىڭ ءوز-وزىنە قول سالعان جەرىنە قاراپ، ونىڭ نە سەبەپتى ومىرىمەن قوشتاسقانىن اڭعارۋعا بولادى ەكەن. مىسالى، بالا ۇيىندە سۋيتسيد جاساسا، وتباسىندا كيكىلجىڭ بولۋى مۇمكىن. ال ءولىم ورنى مەكتەپ بولسا، دەمەك سىنىپتاستارىمەن نەمەسە ۇستازدارىنىڭ اراسىندا كەلىسپەۋشىلىك بولعان، الدە وقۋ ۇلگەرىمىندە قيىندىقتار تۋىنداعان. كەيدە ادام الدىنا قويعان ماقساتىنا جەتە الماعاندا وزىنە قول سالۋعا ءماجبۇر بولاتىنىن ماماندار ءجيى العا تارتادى.
– ءوز-وزىنە قول سالۋعا كوبىنە وتباسىلىق جاعدايدىڭ تومەندەۋى، جۇمىستان شىعىپ قالعان ادامدار بارادى. كەيدە ۇزاق ۋاقىت بويى كۇيزەلىستە جۇرگەن ادامدار سۋيتسيد جاسايدى. ستاتيستيكاعا سۇيەنەتىن بولساق، ءوز-وزىنە قول سالۋ كەيىنگى كەزدەرى ەر ادامداردىڭ اراسىندا كوپ كەزدەسەتىن بولعان. ناقتى جاسىنا كەلسەك، ءوزىن ولىمگە قيعانداردىڭ ورتاشا جاسى 18 بەن 30 جاس ارالىعىن قۇرايدى، – دەيدى تاراز قالالىق پوليتسيا باسقارماسىنىڭ رەسمي وكىلى، پوليتسيانىڭ اعا لەيتەنانتى جانەركە ءازىمحان.
ال ايەل زاتى كوپ جاعدايدا جىگىتى الداپ سوققاندا، ارىن تاپتاعاندا وزىنە قول سالادى. ال ەركەكتەرگە نە جورىق؟ نە سەبەپتى كەيىنگى كەزدەرى ەركەكتەردىڭ ءسۋيتسيدى كوبەيدى؟
– بۇعان باستى سەبەپ – كارانتين. الەمدىك پاندەميا كەزىندە ۇيدە وتىرىپ قالعان ەركەك ءوزىن قاماۋدا ءجۇرگەندەي سەزىنە باستادى. ەركەك – ەركىندىكتى سۇيەتىن جاراتىلىس. اتام زاماننان ەر-ازاماتتار تۇزدە جۇرسە، ايەل بالاسى وشاق قاسىندا بولدى. كارانتين، مىنە وسى قالىپتاسقان تابيعي زاڭدىلىقتى بۇزدى. ۇيدە بالا-شاعانىڭ قامىمەن جۇرەتىن ايەل ءۇشىن كارانتين سەزىلگەن جوق. سەبەبى انالاردىڭ دەنى ءومىرىن ۇيدە، بالا كۇتىمىمەن وتكىزەدى. ال ەر-ازاماتتار ءۇي قابىرعاسىنا سىيماي، ءوزىن كەرەكسىز سەزىنە باستادى.
ەر-ازاماتتار ءۇشىن نەگىزى كۇندەلىكتى جاڭالىق، ادرەنالين دۇنيەلەر كەرەك. اشۋىنىڭ باسۋىن دا ولار سودان تابادى. ال ۇيدە وتىرىپ قالعان ەركەك اشۋشاڭ، ءسوز كوتەرە المايتىن، نە بولسا سوعان ءتيسىپ وتىراتىن كۇيگە ءتۇستى. ونى جايشىلىقتا كۇيەۋىن كەشكىسىن ءبىر-اق كورەتىن ايەلدەردىڭ دەنى كوتەرە المادى. سودان ۇيدە ۇرىس شىعىپ، سوڭى شاڭىراق شايقالدى. ايەل بالا-شاعانى الىپ توركىنگە كەتسە، ەركەك وكپە مەن اشۋىن اراقپەن جازدى. وسىلايشا، جۇيكە كۇيزەلىسىنە تۇسكەن ەر-ازاماتتار ءوزىن جالعىز سەزىنىپ، سوڭى ءوز ءومىرىن ولىمگە قيىپ جاتادى، – دەيدى پسيحولوگ ەرتاي جۇمات.
سونىمەن قاتار مامان كارانتين كەزىندە كوپ تىرشىلىك توقتاعاندىقتان، حالىقتىڭ دەنى قارىزىن قايتارا الماي، بيزنەستەرى بانكروتقا ۇشىراعانىن، بۇل جاعدايعا تۇسكەن ەرلەر ءوز-وزىنە قول جۇمساۋى مۇمكىن ەكەنىن ايتتى.
"ادىرنا" ۇلتتىق پورتالى.
