13 ءساۋىر كۇنى ستەپنوگورسك قالاسىندا قايعىلى وقيعا ورىن الدى، دەپ حابارلايدى "ادىرنا" ۇلتتىق پورتالى.
2020 جىلى تۋعان بالا كوپقاباتتى تۇرعىن ءۇيدىڭ التىنشى قاباتىنان قۇلاپ كەتكەن. اۋىر جاراقات العان ءبۇلدىرشىن جەدەل تۇردە مەديتسينالىق مەكەمەگە جەتكىزىلگەن. الايدا دارىگەرلەر ونىڭ ءومىرىن ساقتاپ قالا المادى.
اقمولا وبلىسى پوليتسيا دەپارتامەنتىنىڭ ءباسپاسوز قىزمەتى وقيعا فاكتىسى بويىنشا سوتقا دەيىنگى تەرگەۋ باستالعانىن مالىمدەدى. قازىرگى ۋاقىتتا قايعىلى جاعدايدىڭ بارلىق ءمان-جايى مەن سەبەپتەرى انىقتالىپ جاتىر. تەرگەۋ ناتيجەسىنە سايكەس پروتسەسسۋالدىق شەشىم قابىلدانادى.
پوليتسيا وكىلدەرىنىڭ ايتۋىنشا، كۇننىڭ جىلىنۋىنا بايلانىستى مۇنداي جازاتايىم وقيعالار جيىلەي تۇسەدى. بيىلدىڭ وزىندە اقمولا وبلىسىندا بالالاردىڭ تەرەزەدەن قۇلاۋىنا قاتىستى بەس جاعداي تىركەلگەن. سونىڭ ءبىرى ولىممەن اياقتالعان.
