اقش پرەزيدەنتى دونالد ترامپ يران پورتتارىنا تەڭىز بلوكاداسىن ەنگىزدى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
اقش اسكەري قولباسشىلىعى بۇل شارا باسقا ەلدەرگە باعىت العان نەمەسە كەرى قايتقان كەمەلەردىڭ وتۋىنە كەدەرگى كەلتىرمەيتىنىن ناقتىلادى. دەگەنمەن، پارسى شىعاناعى ايماعىندا جاعداي شيەلەنىسىپ، مۇناي باعاسى قايتادان باررەلىنە 100 دوللاردان استى.
بلوكادا رەسمي باستالعان العاشقى مينۋتتاردا كوممەرتسيالىق كەمەلەردىڭ ۇستالعانى تۋرالى اقپارات تىركەلگەن جوق.
ۇلىبريتانيانىڭ تەڭىز ساۋدا وپەراتسيالارى ورتالىعىنىڭ دۋبايداعى كەڭسەسى ارقىلى پارسى شىعاناعىنداعى اسكەري جانە ازاماتتىق كەمەلەر اراسىنداعى ۇيلەستىرۋدى جۇرگىزىپ وتىرعانىن حابارلادى. ۇيىمنىڭ مالىمەتىنشە، وقشاۋلاۋ يراننىڭ بۇكىل جاعالاۋ ايماعىن قامتيدى.
ورتالىق كەمەلەرگە ارنالعان نۇسقاۋلىقتى جاريالاپ، جاعدايعا بايلانىستى قوسىمشا اقپارات كەيىنىرەك بەرىلەتىنىن مالىمدەدى.
دونالد ترامپ الەۋمەتتىك جەلىدەگى مالىمدەمەسىندە يران فلوتىنىڭ نەگىزگى بولىگى جويىلعانىن ايتىپ، بلوكادا ايماعىنا جاقىنداعان اسكەري كەمەلەر «جويىلادى» دەپ ەسكەرتۋ جاسادى.
ءوز كەزەگىندە يران پارلامەنتىنىڭ سپيكەرى موحامماد-باگەر گاليباف ەلدىڭ قىسىمعا مويىمايتىنىن مالىمدەدى. سونداي-اق يران يسلام رەۆوليۋتسياسى ساقشىلار كورپۋسى ورمۇز بۇعازىنا جاقىنداعان اسكەري كەمەلەرگە قاتاڭ جاۋاپ بەرىلەتىنىن ەسكەرتتى.
