بۇگىن شىمكەنتتە ەكى سپورت الاڭى اشىلدى. ونىڭ ءبىرى ەڭبەكشى، ەكىنشىسى قالانىڭ حالىق تىعىز ورنالاسقان اباي اۋدانىندا پايدالانۋعا بەرىلدى. سپورت نىساندارىنىڭ اشىلۋ سالتاناتىنا قالا اكىمى مۇرات ايتەنوۆ قاتىستى. سپورت الاڭدارى دەمەۋشىلەر قارجىسىنا سالىنعان. جاقىن ماڭداعى اۋدان بالالارى ەندى ۆولەيبول، باسكەتبول، فۋتبول جانە ستريت ۆوركاۋتپەن اينالىسا الادى.
اباي اۋدانى – شىمكەنتتە حالىق تىعىز ورنالاسقان اۋدانداردىڭ ءبىرى، مۇندا جۇزدەگەن كوپبالالى وتباسىلار تۇرادى. بۇگىن مۇندا قۇنى 14,5 ملن تەڭگە بولاتىن كوپ فۋنكتسيونالدى سپورت الاڭى اشىلدى. بۇل دەمەۋشى – «Eurasian Resources Group» جشس قاراجاتىنا سالىنعان. الاڭ 300 شارشى مەتردەن استام اۋماقتى قامتيدى. مۇندا دەنە شىنىقتىرۋ، ۆولەيبول، باسكەتبول، فۋتبول مەن ستريت ۆوركاۋتقا ارنالعان سپورتتىق جابدىقتار بار. نىساننىڭ اشىلۋ سالتاناتىنا شىمكەنت قالاسىنىڭ اكىمى دە قاتىستى.
مۇرات ايتەنوۆ، شىمكەنت قالاسىنىڭ اكىمى: «دەنى ساۋ ۇلت-بۇل ەڭ باستىسى، مەملەكەت باسشىسى ءوز جولداۋىندا قوعامدىق سپورت پەن دەنى ساۋ ۇلتقا نازار اۋدارۋ كەرەكتىگىن ايتقان. سپورت الاڭدارى جوق جەرلەردەن اشىپ جاتىرمىز. بالالار شۇعىلدانادى دەپ ويلايمىن. ءبىز مۇندا ءبىلىم باسقارماسىنان جاتتىقتىرۋشىلاردى بولدىك. ماقساتتى تۇردە دارىندى بالالاردى ىزدەۋ ءجۇرىپ جاتىر».
اباي اۋدانىندا سوڭعى 7 جىلدا بارلىعى 58 سپورت الاڭى سالىنعان. بيىل ولاردىڭ سانى ودان دا كوپ بولادى، سپورت الاڭدارىن ورناتۋعا 1 ملرد. 389 ملن. تەڭگە قاراجات ءبولىنىپتى. ولاردىڭ ارقايسىسىندا جاتتىقتىرۋشىلار جۇمىس ىستەيدى.
راۋان ساپارباەۆ، جاتتىقتىرۋشى: «ءبىز ءسىزدى ارنايى شاقىرامىز باسسەينگە. ءبىزدىڭ ول جاقتا مەنەدجەرلەرىمىز وتىرادى. ءسىز دوكۋمەنتتى الىپ كەلەسىز بالانىڭ، توپقا جازاسىز. بىزدە 7 ترەنەرىمىز بار قازىر جۇمىس ىستەپ جاتقان. ءوزىڭىز تاڭدايسىز قاي ترەنەرگە باراسىز».
ەڭبەكشى اۋدانى قاراباستاۋ تۇرعىن الابىندا دەمەۋشىلىك قاراجاتقا سالىنعان تاعى ءبىر سپورت الاڭى اشىلدى. مۇندا 9 مىڭعا جۋىق ادام تۇرادى، ولاردىڭ ۇشتەن ءبىرى بالالار. سۋ جاڭا سپورت نىسانىنىڭ قۇنى 13 ميلليون تەڭگە. اۋداندا قازىردىڭ وزىندە 85 سپورت الاڭى جۇمىس ىستەيدى، بيىل تاعى 15 الاڭنىڭ قۇرىلىسى جوسپارلانۋدا.
