Búgin Shymkentte eki sport alańy ashyldy. Onyń biri Eńbekshi, ekinshisi qalanyń halyq tyǵyz ornalasqan Abaı aýdanynda paıdalanýǵa berildi. Sport nysandarynyń ashylý saltanatyna qala ákimi Murat Áıtenov qatysty. Sport alańdary demeýshiler qarjysyna salynǵan. Jaqyn mańdaǵy aýdan balalary endi voleıbol, basketbol, fýtbol jáne strıt vorkaýtpen aınalysa alady.
Abaı aýdany – Shymkentte halyq tyǵyz ornalasqan aýdandardyń biri, munda júzdegen kópbalaly otbasylar turady. Búgin munda quny 14,5 mln teńge bolatyn kóp fýnkıonaldy sport alańy ashyldy. Bul demeýshi – «Eurasian Resources Group» JShS qarajatyna salynǵan. Alań 300 sharshy metrden astam aýmaqty qamtıdy. Munda dene shynyqtyrý, voleıbol, basketbol, fýtbol men strıt vorkaýtqa arnalǵan sporttyq jabdyqtar bar. Nysannyń ashylý saltanatyna Shymkent qalasynyń ákimi de qatysty.
Murat Áıtenov, Shymkent qalasynyń ákimi: «Deni saý ult-bul eń bastysy, Memleket basshysy óz Joldaýynda qoǵamdyq sport pen deni saý ultqa nazar aýdarý kerektigin aıtqan. Sport alańdary joq jerlerden ashyp jatyrmyz. Balalar shuǵyldanady dep oılaımyn. Biz munda bilim basqarmasynan jattyqtyrýshylardy bóldik. Maqsatty túrde daryndy balalardy izdeý júrip jatyr».
Abaı aýdanynda sońǵy 7 jylda barlyǵy 58 sport alańy salynǵan. Bıyl olardyń sany odan da kóp bolady, sport alańdaryn ornatýǵa 1 mlrd. 389 mln. teńge qarajat bólinipti. Olardyń árqaısysynda jattyqtyrýshylar jumys isteıdi.
Raýan Saparbaev, jattyqtyrýshy: «Biz sizdi arnaıy shaqyramyz basseınge. Bizdiń ol jaqta menedjerlerimiz otyrady. Siz dokýmentti alyp kelesiz balanyń, topqa jazasyz. Bizde 7 trenerimiz bar qazir jumys istep jatqan. Ózińiz tańdaısyz qaı trenerge barasyz».
Eńbekshi aýdany Qarabastaý turǵyn alabynda demeýshilik qarajatqa salynǵan taǵy bir sport alańy ashyldy. Munda 9 myńǵa jýyq adam turady, olardyń úshten biri balalar. Sý jańa sport nysanynyń quny 13 mıllıon teńge. Aýdanda qazirdiń ózinde 85 sport alańy jumys isteıdi, bıyl taǵy 15 alańnyń qurylysy josparlanýda.
