فوتو: دياپازون
اقتوبە وبلىستىق سوتىنىڭ قىلمىستىق ىستەر جونىندەگى سوت القاسى مەكتەپ وقۋشىسىنىڭ ولىمىنە بايلانىستى سوتتالعاندارعا تاعايىندالعان جازانى وزگەرتتى. بۇل تۋرالى دياپازون باسىلىمى جازدى، دەپ حابارلايدى "ادىرنا".
قايعىلى وقيعا 2024 جىلدىڭ قىركۇيەك ايىندا اقتوبە وبلىسىنىڭ قوپا اۋىلىندا بولعان. تەرگەۋ دەرەكتەرىنە سايكەس، 10 جانە 11-سىنىپتا وقيتىن وقۋشىلار «كىشى سىنىپ وقۋشىلارى ۇلكەندەرگە قۇرمەت كورسەتپەدى» دەگەن جەلەۋمەن 9-سىنىپ وقۋشىلارىن ۇرىپ-سوققان. سونىڭ سالدارىنان 14 جاستاعى نۇرجان سىدىق العان جاراقاتىنان وقيعا ورنىندا كوز جۇمدى.
ءىس بويىنشا ايىپتالۋشى رەتىندە 17 جاستاعى التى ءجاسوسپىرىم تارتىلعان. 2025 جىلدىڭ قازان ايىندا بۇل ءىس بويىنشا العاشقى ۇكىم شىقتى. سوت ءۇش ايىپتالۋشىنى «الدىن الا ءسوز بايلاسۋ ارقىلى ادامدار توبى بولىپ جاسالعان بۇزاقىلىق» بابى بويىنشا 1 جىلعا باس بوستاندىعىن شەكتەۋ جازاسىنا كەستى.
2024 جىلعى قىركۇيەكتە قوپا اۋىلىندا 10 جانە 11-سىنىپ وقۋشىلارى 9-سىنىپتاعى وقۋشىلاردى "كىشى سىنىپ وقۋشىلارى ۇلكەندەرگە قۇرمەت كورسەتپەدى" دەگەن سەبەپپەن ۇرىپ-سوققان. سونىڭ سالدارىنان 14 جاستاعى وقۋشى نۇرجان سىدىق وقيعا ورنىندا كوز جۇمدى.
تاعى ەكەۋىنە ەكى باپ بويىنشا - "بۇزاقىلىق" جانە "جابىرلەنۋشىنىڭ ولىمىنە ابايسىزدا اكەلىپ سوققان قاساقانا اۋىر دەنە جاراقاتىن كەلتىرۋدى ۇيىمداستىرۋ" - 6 جىل 8 ايعا باس بوستاندىعىنان ايىرۋ جازاسى بەرىلدى. ال ولاردىڭ تاعى ءبىر سىبايلاسى "جابىرلەنۋشىنىڭ ولىمىنە ابايسىزدا اكەلىپ سوققان قاساقانا اۋىر دەنە جاراقاتىن كەلتىرۋ" بابى بويىنشا ءدال سونداي ناقتى مەرزىمگە سوتتالدى.
ناقتى مەرزىمگە سوتتالعان ءۇش ادام دا، سونداي-اق، جابىرلەنۋشى تاراپ تا ۇكىمگە شاعىم تۇسىرگەن.
"قىلمىستىق ىستەرى جونىندەگى سوت القاسى ءىستى قايتا قاراپ، ىزگىلىك تانىتىپ، وسى ۇشەۋىنىڭ جازاسىن ناقتى مەرزىمنەن شارتتى جازاعا اۋىستىردى. ياعني القا قاۋلىسىنا سايكەس ولار بوستاندىققا شىعارىلدى: بەلگىلى ءبىر شەكتەۋلەرمەن جازانى بوستاندىقتا وتەيدى", - دەپ جازادى باسىلىم.
وبلىستىق سوتتىڭ ءباسپاسوز قىزمەتى سوتتالعانداردىڭ كىناسىن مويىنداعانىن، وكىنىش بىلدىرگەنىن جانە جابىرلەنۋشى تاراپپەن مەدياتسيالىق كەلىسىم جاساعانىن حابارلادى.
قازا تاپقان وقۋشىنىڭ تۋىستارى دا سوتتالعاندارعا جازانى جەڭىلدەتۋدى وزدەرى سۇراعان. جاريالانىمدا ءدال وسى جايتتاردىڭ ءبارى جازانى ناقتى مەرزىمنەن شارتتى جازاعا وزگەرتۋگە نەگىز بولعانى ايتىلعان.
