قاراعاندىدا پوليتسيا بالالار مەكەمەسىنىڭ تاربيەلەنۋشىلەرىنەن اقشا بوپسالاۋمەن اينالىسقان توپتىڭ قىزمەتىن توقتاتتى، دەپ حابارلايدى "ادىرنا".
قاراعاندى قالاسىندا پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسىنىڭ جەدەل قىزمەتكەرلەرى پروكۋراتۋرامەن ءوزارا ءىس-قيمىل بارىسىندا الەۋمەتتىك وسال ساناتتاعى ازاماتتارعا ارنالعان ارنايى مەملەكەتتىك تولەمدەردەن اقشا بوپسالاۋعا قاتىسى بار ۇيىمداسقان توپتىڭ زاڭسىز ارەكەتىن اشكەرەلەدى.
جەدەل ءىس-شارالار بارىسىندا وڭىردەگى بالالارعا ارنالعان مەكەمەلەردىڭ ءبىرىنىڭ تاربيەلەنۋشىلەرى قىلمىسكەرلەردىڭ قۇربانى بولعانى انىقتالدى.
الدىن الا مالىمەتكە سۇيەنسەك، سوڭعى جارتى جىل ىشىندە كۇدىكتىلەر الداۋ، قورقىتۋ جانە فيزيكالىق كۇش قولدانۋ ارقىلى بىرنەشە جابىرلەنۋشىدەن جالپى سوماسى 10 ميلليون تەڭگەدەن استام قاراجاتتى يەمدەنگەن. ولاردى ارنايى شوتتاردان اقشا شەشۋگە، سونداي-اق ميكروقارجى ۇيىمدارىندا نەسيە راسىمدەۋگە ماجبۇرلەگەن.
جۇرگىزىلگەن جەدەل-ىزدەستىرۋ ءىس-شارالارى ناتيجەسىندە كۇدىكتىلەردەن اۆتوماتتى اتىس قارۋىنا ارنالعان وقجاتارلار جانە جۇزدەن استام وق-ءدارى تاركىلەندى.
اتالعان دەرەك بويىنشا بوپسالاۋ بەلگىلەرىمەن سوتقا دەيىنگى تەرگەپ-تەكسەرۋ باستالدى. بارلىق كۇدىكتى ۇستالدى. ولارعا 10 جىلعا دەيىن باس بوستاندىعىنان ايىرۋ جازاسى تاعايىندالۋى مۇمكىن.
پوليتسيا ولاردىڭ باسقا دا وسىعان ۇقساس قىلمىستارعا قاتىستىلىعىن انىقتاۋ بويىنشا جۇمىستى جالعاستىرىپ جاتىر.
