تۇركىستان وبلىسى، كەلەس اۋدانىنىڭ اقساقالدارى 48 بالانىڭ ومىرىنە اراشا ءتۇسىپ، جەتىمدىكتەن ساقتاپ قالدى. وسىلاي دەگەن ۇشقىن اۋىل اكىمشىلىگىنىڭ ارداگەرلەر كەڭەسىنىڭ توراعاسى لەسبەك جۇماعۇلوۆ اكىمدىك جانىنان قۇرىلعان ارداگەرلەر كەڭەسى جانە اجەلەر كەڭەسىنىڭ بىرقاتار تىندىرىمدى تىرلىكتەرىن ورتاعا سالدى. باسقوسۋ بارىسىندا كەلەستىك اقساقالداردىڭ ەرلىگى جايلى ايتىلدى.
«بۇگىندە جاستار اراسىندا قاريالار تاراپىنان تالىمدىك، تاربيەلىك ءمانى بار ۇگىت ناسيحاتتاردى جۇرگىزۋدەمىز. بۇگىنگىنىڭ ويلاندىراتىنى – جاس وتباسىلاردىڭ بۇزىلۋى. كوڭىلگە كىربىڭ كەلتىرەتىن وقيعانى الدىن-الۋ باعىتىندا اجەلەر كەڭەسىمەن بىرىگىپ، جاستاردىڭ شاڭىراعىنا بارىپ، ونەگەلى اڭگىمەلەر ايتۋدامىز. بۇگىندە شاڭىراعى شايقالماق بولعان 24 وتباسى بىزگە جۇگىندى. سول وتباسىلاردى اقساقالدارىمەن بىرلەسە سابىرعا شاقىرىپ، ورتاعا الىپ ماسەلەنى شەشتىك. اللاعا شۇكىر، ولاردان تاراعان 48 بالانى ءتىرى جەتىمدىكتەن ساقتادىق دەپ ايتا الامىن»، – دەيدى لەسبەك جۇماعۇلوۆ.
اقساقالدىڭ ايتۋىنشا، اجىراسپاق بولعانداردىڭ اراسىندا جاسى 60 القىمداعان ەل اعالارى دا بار ەكەن. ولارمەن دە ءتۇسىندىرۋ جۇمىستارىن جۇرگىزگەن كەڭەس توراعاسى ناتيجەلى مەجەگە قول جەتكىزىپتى. وسى باعىتتاعى جۇمىستار جەتىلدىرىلۋدە. وتباسى قۇندىلىعى مەن ىنتىماعىن ساقتاۋدا ەنەلەردىڭ ورنى وراسان ەكەنىن ايتىلعان وتىرىستا «ەنەلەر مەكتەبى» دەگەن ۇيىم اشۋ تۋرالى ۇسىنىس ايتىلدى.
"ادىرنا" ۇلتتىق پورتالى
