شىمكەنتتەگى «كورمە» ورتالىعىندا قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي قالا اكىمدىگى ۇيىمداستىرعان «Shymkent Önımderı — 2021» اتتى جەرگىلىكتى تاۋار وندىرۋشىلەردىڭ كورمەسى باستالدى.
ءۇش كۇن بويى جالعاساتىن كورمەنىڭ ماقساتى — جەرگىلىكتى تاۋار وندىرۋشىلەردى تۇتىنۋشىلارعا كەڭىنەن تانىستىرىپ، ولاردىڭ ءىسىن ىلگەرىلەتۋگە كومەكتەسۋ. بۇل شاراعا وڭدەۋ ونەركاسىبى باعىتىندا جۇمىس ىستەپ، دايىن ءونىم شىعارىپ جاتقان 100-گە جۋىق شىمكەنتتىك كومپانيا قاتىسۋدا. ولاردىڭ اراسىندا قۇرىلىس ماتەريالدارىن، جيھاز، مەديتسينالىق قۇرال-جابدىقتار وندىرەتىن كاسىپورىندار بار.
شىمكەنت قالاسىنىڭ اكىمى مۇرات ايتەنوۆ كورمەنى ارالاپ، ۇسىنىلعان تاۋارلارمەن تانىسىپ شىقتى.
—مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس، 2025 جىلعا دەيىن وڭدەۋ ونەركاسىبىندەگى ەكسپورت كولەمىن 1.5 ەسەگە، ال، ەڭبەك ونىمدىلىگىن 30 پايىزعا ارتتىرۋعا ءتيىسپىز. وسى ماقساتقا قول جەتكىزۋ ءۇشىن بۇگىندە شىمكەنت قالاسىندا جەرگىلىكتى تاۋار وندىرۋشىلەرگە جۇيەلى تۇردە جان-جاقتى قولداۋ كورسەتىلىپ كەلەدى. بۇگىنگى كورمە سونىڭ ءبىر ايعاعى. بۇل ءىس-شاراعا ءتۇرلى مەملەكەتتىك ورگانداردىڭ، جوبالاۋشى جانە مەردىگەر مەكەمەلەردىڭ وكىلدەرى جانە وزگە دە الەۋەتتى ساتىپ الۋشىلار قاتىسۋدا. مۇندا تاۋار وندىرۋشىلەر ءوز ونىمدەرىن تانىستىرىپ قانا قويماي، ءوزارا ءتيىمدى كەلىسىمدەر جاساۋ مۇمكىندىگىنە يە، — دەدى شىمكەنت قالاسىنىڭ اكىمى مۇرات ايتەنوۆ.
كورمەگە قاتىسۋشى كومپانيالاردىڭ ءبىرى — «MedCamfort» جشس-ءى. بۇل كاسىپورىن مەديتسينالىق جيھاز بەن قۇرال-جابدىقتار وندىرەدى.
ء—بىزدىڭ كاسىپورىن 2016 جىلدان بەرى جۇمىس ىستەپ كەلەدى. بۇگىندە 50 ادامدى جۇمىسپەن قامتىپ وتىرمىز. كەز كەلگەن ەمحانا مەن اۋرۋحانانى مەديتسينالىق قۇرال-جابدىقتار جانە جيھازبەن تولىق جابدىقتاي الامىز. اسىرەسە، كۋشەتكالار مەن ءتورت فۋنكتسيونالدى اۆتوماتتاندىرىلعان كەرەۋەتتەرگە سۇرانىس جوعارى. ءوندىرىستى كەڭەيتۋ ماقساتىندا «جۇلدىز» يندۋستريالدى ايماعىنان ۇلكەن جاڭا زاۋىت سالىپ جاتىرمىز، — دەيدى «MedCamfort» جشس-ءىنىڭ اتقارۋشى ديرەكتورى جادىرا انۋاربەكقىزى.
ايتا كەتەيىك، كورمەنىڭ اياسىندا ءتۇرلى بايقاۋلار مەن ەكسپورتتى ىلگەرىلەتۋ جونىندەگى كەڭەس وتكىزىلەدى. وندا تاۋار وندىرۋشىلەرگە مەملەكەتتىك قولداۋ شارالارى ءتۇسىندىرىلىپ، ەكسپورتقا شىعۋ بارىسىنداعى پروبلەمالاردى كاسىپكەرلەرمەن بىرلەسىپ تالقىلاۋ جوسپارلانعان.
