تاۋەلسىزدىكتىڭ 30 جىلدىعى جانە ستۋدەنتتەر كۇنى مەن «جۇلدىزدى 30 كۇن» جوباسى اياسىندا شىمكەنتتەگى يندۋستريالىق-تەحنيكالىق كوللەدجىندە قالاداعى ارناۋلى وقۋ ورىندارى ستۋدەنتتەرىنىڭ «ءبىلىمدى جاس — قازاقستاننىڭ بولاشاعى» اتتى فەستيۆالى ءوتتى.
مەرەكەلىك ءىس-شارادا ارنايى كورمە ۇيىمداستىرىلدى. وندا ءار كوللەدج كاسىپتىك ماماندىعىنا قاراي ستۋدەنتتەر قولىمەن جاسالعان بۇيىمداردى كەلۋشىلەر نازارىنا ۇسىندى. سونداي-اق فەستيۆال بارىسىندا شاكىرتتەر اراسىندا پىكىرتالاس سايىسى ءوتىپ، ستۋدەنتتەر پارلامەنتارياسى ۇيىمداستىرىلدى.
— پاندەمياعا بايلانىستى كوللەدج شاكىرتتەرى كونتسەرتتىك ءىس-شارالارعا قاتىسا الماي قالعان ەدى. كارانتيندىك تالاپتاردىڭ جەڭىلدەۋىنىڭ ارقاسىندا كوپتەن بەرى ەندى وفلاين رەجيمدە فەستيۆال ۇيىمداستىرىپ جاتىرمىز. بۇعان ستۋدەنتتەردىڭ بارلىعى ءدان ريزا، قۋانىشتارىندا شەك جوق. ءىس-شارالاردىڭ بارلىعىنا بەلسەنە قاتىسۋدا. فەستيۆالدىڭ باستى ماقساتى- تاۋەلسىزدىكتىڭ 30 جىلدىعىن اتاپ ءوتۋ بولسا، ەكىنشى جاعىنان وسىنداي مەرەكەلىك ءىس-شارا ارقىلى ارناۋلى وقۋ ورىندارىمەن بايلانىس نىعايىپ، ورتاق ماسەلەلەر ورتاعا سالىنىپ ءارى ستۋدەنتتەر ءوزارا تانىسۋعا، تاجىريبە الماسۋعا زور مۇمكىندىك الادى. سونىمەن بىرگە ءوزىن-ءوزى تانۋ ءپانى بويىنشا ءبىزدىڭ ءبىلىم وشاعى رەسپۋبليكادا پيلوتتىق جوباعا كىرگەن. وسى فەستيۆالدە سونىڭ اياسىندا ۆەبينار وتكىزىلدى. ەگەمەندىكتى ەڭسەلى ەتۋ جولىندا كاسىپتىك كوللەدجدەردىڭ جۇمىسشى ماماندار دايارلاۋدا قوسار ۇلەسى وتە زور. مەملەكەت تاراپىنان دا ارناۋلى وقۋ ورىندارىنا كورسەتىلەتىن قولداۋ شارالارى جىلدان-جىلعا ۇلعايتىپ كەلەدى. سوندىقتان كەلەشەكتە كاسىپتىك ماماندىقتار وقىتۋدا كوللەدجدەردىڭ اتاق-ابىرويى ودان سايىن ارتادى دەگەن ۇمىتتەمىن، - دەدى يندۋستريالىق-تەحنيكالىق كوللەدج ديرەكتورى، ەكونوميكا عىلىمدارىنىڭ دوكتورى، پروفەسسور تىلەك يساحمەتوۆ.
كوللەدجدەر اراسىندا ءوتىپ جاتقان فەستيۆال سوڭى ونەرلى ستۋدەنت جاستاردان قۇرالعان كوركەمونەرپازدار توبىنىڭ مەرەكەلىك كونتسەرتىمەن اياقتالدى.
