ءۇشىنشى مەگاپوليستە ەلىمىزدەگى موبيلوگرافتار باس قوستى. ەل تاۋەلسىزدىگىنىڭ 30 جىلدىعىنا وراي تۇركىستان سارايىندا تۋريزم جانە سىرتقى بايلانىستار باسقارماسىنىڭ ۇيىمداستىرۋىمەن «كرەاتيۆتى يندۋستريا» باعىتى اياسىندا رەسپۋبليكالىق «Shymkent Mobilography Fest» فەستيۆالى ءوتتى.
ءىس-شارا اياسىندا وتكەن پلەنارلىق كەزدەسۋگە قالا اكىمىنىڭ ورىنباسارى ماقسۇت يساحوۆ جانە قىران تالاپبەك، وركەن كەنجەبەك، سىرىمبەك تاۋ، اقبوتا انۋاربەك، ادىلەت راحمەتوللا سىندى مەديا سالاسى مەن ءتۇرلى باعىتتا ءوز باستامالارىن دامىتىپ جۇرگەن الەۋمەتتىك جەلى بەلسەندىلەرى قاتىسىپ، كرەاتيۆتى يندۋستريا مەن موبيلوگرافيانىڭ تۋريزم سالاسىنداعى رولىنە ەرەكشە توقتالىپ ءوتتى.
– ۇلتتىق كرەاتيۆتى دامىتۋ زامان تالابىنا ساي تەندەنتسيا ەكەنىن ەسكەرە كەلە، ءبىز شىمكەنت قالاسىن ەلىمىزدەگى ءىرى كرەاتيۆتى حابتاردىڭ بىرىنە اينالدىرۋدى قولعا الىپ وتىرمىز. وسى باعىتتاعى جۇمىستىڭ باستاماسى رەتىندە بۇگىن، مىنە، قازاقستاندا العاش رەت رەسپۋبليكامىزدىڭ ءار وڭىرىنەن تالانتتى موبيلوگرافتاردىڭ باسىن قوسىپ، موبيلوگرافيا فەستيۆالىن ۇيىمداستىردىق. بۇل سالا كرەاتيۆتى يندۋستريانىڭ اجىراماس بولىگى بولا وتىرىپ، ءتۋريزمنىڭ مۇمكىندىكتەرىن جارنامالاۋعا تاپتىرماس قۇرال بولىپ تابىلادى. ءبىز بۇل باستامانى ءارى قاراي جالعاستىرىپ، اۋقىمىن كەڭەيتىپ، شىمكەنت قالاسىندا موبيلوگرافتاردى بىرىكتىرەتىن جىل سايىنعى ۇردىسكە اينالدىراتىن بولامىز، - دەگەن ماقسۇت پەرنەبايۇلى.
قاتىسۋشىلاردىڭ باسىم بولىگى شىمكەنت جانە نۇر-سۇلتان، الماتى، تۇركىستان ت.ب قالالاردان كەلگەن. ەكى كۇنگە سوزىلاتىن ءىس-شاراعا جالپى سانى 900-گە جۋىق ادام ءوتىنىم بىلدىرگەن. ولار سايىستىڭ العاشقى كۇنىندە الدىن-الا بەرىلگەن «Welcome to Shymkent» تاقىرىبى اياسىندا قالا تۋرالى يميدجدىك جانە كرەاتيۆتى جارنامالىق بەينەروليكتەر ءتۇسىردى. دايىن بەينەروليكتەردى «موبيلوگرافيا» سالاسىن قازاقستاندا دامىتقان قىران تالاپبەك باستاعان كوميسسيا مۇشەلەرى قاراپ، باعالاپ، جەڭىمپازدار ءتىزىمىن جاريالايدى.
ايتا كەتەيىك، ەكى كۇندىك فەستيۆالدە شىمشاھار تۋرالى 500 دەن استام بەينەروليك ازىرلەنىپ، ول بەينەماتەريالدار الداعى ۋاقىتتا شىمكەنت قالاسى تۋرالى جارنامانى جانداندىرۋ ارقىلى تۋريستەردى تارتۋ ماقساتىندا جاريالانىپ وتىرماق.
