Shymkent elimizdiń kreatıvti habyna aınalady

2524
Adyrna.kz Telegram

Úshinshi megapolıste elimizdegi mobılograftar bas qosty. El táýelsizdiginiń 30 jyldyǵyna oraı Túrkistan saraıynda Týrızm jáne syrtqy baılanystar basqarmasynyń uıymdastyrýymen «Kreatıvti ındýstrııa» baǵyty aıasynda respýblıkalyq «Shymkent Mobilography Fest» festıvali ótti.

Is-shara aıasynda ótken plenarlyq kezdesýge qala ákiminiń orynbasary Maqsut Isahov jáne Qyran Talapbek, Órken Kenjebek, Syrymbek Taý, Aqbota Anýarbek, Ádilet Rahmetolla syndy medıa salasy men túrli baǵytta óz bastamalaryn damytyp júrgen áleýmettik jeli belsendileri qatysyp, kreatıvti ındýstrııa men mobılografııanyń týrızm salasyndaǵy róline erekshe toqtalyp ótti.

– Ulttyq kreatıvti damytý zaman talabyna saı tendenııa ekenin eskere kele, biz Shymkent qalasyn elimizdegi iri kreatıvti habtardyń birine aınaldyrýdy qolǵa alyp otyrmyz. Osy baǵyttaǵy jumystyń bastamasy retinde búgin, mine, Qazaqstanda alǵash ret respýblıkamyzdyń ár óńirinen talantty mobılograftardyń basyn qosyp, mobılografııa festıvalin uıymdastyrdyq. Bul sala kreatıvti ındýstrııanyń ajyramas bóligi bola otyryp, týrızmniń múmkindikterin jarnamalaýǵa taptyrmas qural bolyp tabylady. Biz bul bastamany ári qaraı jalǵastyryp, aýqymyn keńeıtip, Shymkent qalasynda mobılograftardy biriktiretin jyl saıynǵy úrdiske aınaldyratyn bolamyz, - degen Maqsut Pernebaıuly.

Qatysýshylardyń basym bóligi Shymkent jáne Nur-Sultan, Almaty, Túrkistan t.b qalalardan kelgen. Eki kúnge sozylatyn is-sharaǵa jalpy sany 900-ge jýyq adam ótinim bildirgen. Olar saıystyń alǵashqy kúninde aldyn-ala berilgen «Welcome to Shymkent» taqyryby aıasynda qala týraly ımıdjdik jáne kreatıvti jarnamalyq beınerolıkter túsirdi. Daıyn beınerolıkterdi «mobılografııa» salasyn Qazaqstanda damytqan Qyran Talapbek bastaǵan komıssııa músheleri qarap, baǵalap, jeńimpazdar tizimin jarııalaıdy.

Aıta keteıik, eki kúndik festıvalde Shymshahar týraly 500 den astam beınerolık ázirlenip, ol beınematerıaldar aldaǵy ýaqytta Shymkent qalasy týraly jarnamany jandandyrý arqyly týrısterdi tartý maqsatynda jarııalanyp otyrmaq.

Pikirler