بۋللينگ قوعامعا قاۋىپ توندىرە باستادى. وسىلاي دەپ ءماجىلىستىڭ جالپى وتىرىسىندا نۇرلان نىعماتۋللين مالىمدەدى. جيىندا دەپۋتاتتار مەن مەملەكەتتىك ورگان وكىلدەرى بالالاردىڭ قۇقىقتارىن قورعاۋعا قاتىستى پىكىر الماسىپ، زاڭ جوباسىن جان-جاقتى تالقىلادى.
ءماجىلىس توراعاسى دەپۋتاتتاردىڭ باستاماسىمەن ازىرلەنگەن زاڭ جوباسىندا بالالاردىڭ تۇرعىن ءۇي جانە وتباسىلىق جاعدايدا مۇددەلەرىن قورعاۋعا، قاداعالاۋسىز جانە پاناسىز قالۋدىڭ الدىن الۋ ماسەلەلەرى قاراستىرىلعانىن اتاپ ءوتتى.
بالالاردىڭ قۇقىعىن قورعاۋ – قوعامنىڭ ورتاق مىندەتى. ءماجىلىستىڭ جالپى وتىرىسىندا وسىلاي دەپ مالىمدەگەن نۇرلان نىعماتۋللين دەپۋتاتتاردىڭ باستاماسىمەن ازىرلەنگەن زاڭ جوباسىندا بالالاردىڭ تۇرعىن ءۇي جانە وتباسىلىق جاعدايدا مۇددەلەرىن قورعاۋعا، قاداعالاۋسىز جانە پاناسىز قالۋدىڭ الدىن الۋ ماسەلەلەرى قاراستىرىلعانىن اتاپ ءوتتى. ونىڭ ايتۋىنشا، بۋللينگ پەن كيبەربۋللينگ قوعامدا قاتتى الاڭداۋشىلىق تۋدىرىپ وتىر. بالالاردى وسى قاۋىپتەن قورعايتىن ناقتى نورمالار قاجەت.
نۇرلان نىعماتۋللين، قر پارلامەنتىنىڭ ءماجىلىس توراعاسى: «شىنىمەن بۋللينگ جانە كيبەربۋللينگ دەگەن بۇل بۇگىن وتە قاۋىپتى نارسە بولىپ بارا جاتىر. ول بالالاردىڭ پسيحولوگياسىن بۇزاتىن سۋيتسيدكە الىپ باراتىن جول. جاڭا ايتىپ كەتكەندەي، بالالاردىڭ، اسىرەسە مەكتەپ بالالارىنىڭ بۋللينگ جانە كيبەربۋللينگتەن قورعايتىن ناقتى نورمالارىمىزدى ەنگىزۋمىز كەرەك ەشكىمگە قاراماي. انالار ايتىپ جاتىر، مىنالار ايتىپ جاتىر. بۇل بالالاردىڭ بولاشاعى، بالالاردىڭ ءومىرى. ونى ۇمىتپاۋىمىز كەرەك».
ماجىلىستە بالالاردىڭ جاعدايىن جاقسارتۋعا ارنالعان زاڭ قارالدى. ءماجىلىس دەپۋتاتى دينارا زاكيەۆانىڭ ايتۋىنشا، زاڭ جوباسىندا ءبىلىم بەرۋ مەكەمەلەرىنىڭ پەداگوگيكالىق قۇرامى مەن قىزمەتكەرلەرى كومەككە مۇقتاج بالاعا ۋاقىتىلى كومەك كورسەتۋ جونىندەگى ادىسنامامەن، سونداي-اق بالالارعا جابىرلەۋدىڭ بەلگىلەرىن تۇسىندىرەتىن جانە ءبىر-بىرىنە قۇرمەتپەن قاراۋعا باۋليتىن باعدارلامالارمەن قامتاماسىز ەتىلەتىندەي جابىرلەۋدىڭ الدىن الۋدىڭ تەتىكتەرى كورسەتىلەدى. بۇل تۇزەتۋ 3 ملن-نان استام وقۋشىنىڭ جاعدايى مەن ءومىرىن جاقسارتۋعا باعىتتالعان.
دينارا زاكيەۆا، ءماجىلىس دەپۋتاتى: «قازاقستان قوعامى ءۇشىن تاعى ءبىر وزەكتى ماسەلە – بالالار مەن جاسوسىرىمدەر اراسىنداعى سۋيتسيد. ستاتيستيكا بويىنشا 2021 جىلعى 6 ايدا ەلدە اياقتالعان 105 سۋيتسيد دەرەگى جانە 193 سۋيتسيد ارەكەتى تىركەلگەن. بۇل رەتتە بىرقاتار وڭىردە سۋيتسيد كورسەتكىشىنىڭ ءوسۋى بايقالادى: تۇركىستان، الماتى، شىعىس قازاقستان وبلىستارى. بۇل – وتە قورقىنىشتى كورسەتكىش. وسىعان بايلانىستى زاڭ جوباسىندا بۇل ماسەلەنى شەشۋ ءۇشىن ورتا ءبىلىم بەرۋ ۇيىمدارىنداعى پسيحولوگيالىق قىزمەتتەردىڭ جۇمىسىن ۇيلەستىرۋ تەتىكتەرىن رەتتەۋ ۇسىنىلادى».
نۇرلان نىعماتۋليننىڭ ايتۋىنشا، بۇل زاڭ جوباسى قازىرگى قوعامعا قاجەتتى كوپتەگەن ماسەلەلەردى، اسىرەسە، بالالاردىڭ قۇقىعىن قورعاۋ جولىنداعى پروبلەمالاردى شەشۋگە ءتيىس. وندا جازىلعان نورمالار، سونىڭ ىشىندە ينتەرنەتتە ازاماتتاردى، اسىرەسە، بالالاردى وسىنداي بۋللينگ جانە كيبەربۋللينگ سياقتى قۇبىلىستاردان قورعاۋى كەرەك.
بۇل نورمالار زامان تالابى ەكەنىن ايتقان ءماجىلىس توراعاسى ايتۋلى زاڭ جوباسى مەملەكەت باسشىسىنىڭ ازاماتتاردى عالامتور ارقىلى قىسىم كورسەتۋدەن زاڭ دەڭگەيىندە قورعاۋ جونىندەگى تاپسىرماسىن ورىنداۋعا باعىتتالعانىن ايتتى.
ءاليحان فايزحانوۆ
