وڭىرىمىزدەگى حيميا-بيولوگيا باعىتىنداعى نازارباەۆ زياتكەرلىك مەكتەبىندە «قازىرگى الەمدەگى قازاقستان» اتتى اشىق ساباق ءوتتى. ءىس-شاراعا شىمكەنت قالاسىنداعى الدىڭعى قاتارلى 30 مەكتەپتەن 900-گە جۋىق وقۋشى ونلاين قاتىسۋعا مۇمكىندىك الدى.
تاۋەلسىزدىك ساباعى «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ اۆتورلىق باعدارلاماسىنىڭ نەگىزىندە ازىرلەنگەن. وندا وقۋشىلار قازاقستاننىڭ تاۋەلسىزدىك جىلدارىندا جەتكەن جەتىستىكتەرى مەن باعىندىرعان بەلەستەرىن اتاپ كورسەتتى.
زياتكەرلەر «تاۋەلسىزدىك – ماڭگىلىك ەلدىڭ تۇعىرى» اتتى بۇگىنگى شارادا ەلدىڭ وتكەن تاريحى مەن بۇگىنگى جەتىستىگىنە شولۋ جاسادى. ساباق بارىسىندا ولار قازاقستاننىڭ 30 جىل ىشىندە جەتكەن بەلەسى جايىندا بايانداپ، جارقىن بولاشاقتىڭ كىلتى – يگى باستامالار ەكەنىن ايتتى.
باينازار سەيتەك، حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ وقۋشىسى: «بۇگىنگى ساباقتا ءبىز تاۋەلسىزدىكتە بولعان وقيعالار، ياعني، مىسالعا نازارباەۆتىڭ باستاۋىمەن يادرولىق قارۋدان باس تارتقان سەكىلدى ۇلكەن باستامالار بىزگە ۇلكەن الەمدىك دەڭگەيدەگى قۇرمەتتى جانە دەموكراتيالىق باستامالار اكەلۋدە. جانە وسىنىڭ ارقاسىندا ءبىز باسقا ەلدەردىڭ اراسىندا ۇلكەن ابىرويعا يە بولىپ وتىرمىز».
«تاۋەلسىزدىكتىڭ جاستارعا سىيلاعان مۇمكىندىگى وتە زور. ونى كەلەر ۇرپاققا امان-ەسەن جەتكىزۋ باستى ماقساتىمىز. سونىمەن قاتار، ەلدىڭ مەرەيىن اسقاقتاتىپ، بيىك شىڭداردان كورىنۋى ءبىزدىڭ قولىمىزدا» دەدى شىمكەنت قالالىق حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ ديرەكتورى قايىربەك بۋكسۋكباەۆ.
«مۇنداي ۇلكەن وزەكتى ماسەلەلەر ءبىزدىڭ جاستارىمىزدان باستاپ، وقۋشىلارىمىز تەرەڭ ويمەن، ارى قاراي دامىپ، ەلىمىز كوركەيەدى دەپ سەنەمىن. سەبەبى، ەلدىڭ ەڭ ءبىرىنشى بايلىعى – بەيبىتشىلىك. بەيبىتشىلىك بولاتىن بولسا، باسقا دا سالالاردىڭ دامۋىنا مۇمكىندىك بار. ونىڭ ىشىندە مەديتسينا، ءبىلىم سالاسى، ءار ءتۇرلى سپورت جۇيەلەرىنىڭ جاڭارتۋلارى، مۇنىڭ ءبارى تەك بەيبىتشىلىكتىڭ ارقاسىندا جۇزەگە اسادى».
مەكتەپ ديرەكتورىنىڭ ايتۋىنشا، جىل سوڭىنا دەيىن قىتاي حالىق رەسپۋبليكاسىنداعى سۋدجوۋ مەكتەبىمەن ونلاين فورماتتا كەزدەسۋ جوسپارلانىپ وتىر. بۇل ونلاين ساباق قازاقستاننىڭ تاۋەلسىزدىك جىلدارىنداعى دامۋى مەن جەتكەن جەتىستىكتەرىن دارىپتەۋگە ارنالماق. الداعى ۋاقىتتا ۇيىمداستىرۋشىلار وسى سىندى ساباقتى وفلاين فورماتتا وتكىزۋگە نيەتتى ەكەنىن دە جەتكىزدى.
گۇلدانا داۋرەن
