«مەرەيلى وتباسى – 2021» ۇلتتىق بايقاۋىنىڭ جەڭىمپازدارى پرەزيدەنت سىيلىعىمەن ماراپاتتالدى. وبلىستىق كەزەڭدەردە توپ جارعان 17 وتباسىنى ماراپاتتاۋ ءراسىمى ونلاين فورماتتا ءوتتى.
تۇركىستان وبلىسىنان جەڭىمپاز اتانعان جامالوۆتار وتباسىنا ماراپاتتى وبلىس اكىمىنىڭ ورىنباسارى ارمان جەتپىسباەۆ تابىستاپ، وڭىردەگى وتباسىلىق تاربيەنى قالىپتاستىرۋعا قوسقان ۇلەسى ءۇشىن ايرىقشا العىسىن ءبىلدىردى. بايقاۋ جەڭىمپازدارىنا ارنايى ستاتۋەتكا مەن قوماقتى قارجىلاي سىيلىق تابىس ەتىلدى.
«بۇگىن مەن ءۇشىن ەرەكشە كۇن. سەبەبى، پرەزيدەنتتەن وسىنداي ماراپات الۋ بۇيىرعان ەكەن. قاراپايىم اۋىلدان شىعىپ، شارۋا قوجالىعىمەن اينالىساتىن جانۇيامىز. «مەرەيلى وتباسى» كونكۋرسىنا قاتىسىپ، جەڭىمپاز اتانىپ وتىر. ەلباسىمىزدىڭ سالىپ بەرگەن سارا جولىنىڭ ارقاسىندا ەلىمىز وركەندەپ، ۇلتتىق قۇندىلىقتارىمىز وركەندەپ كەلەدى. تاۋەلسىزدىگىمىزدىڭ 30 جىلدىعىمەن تۇسپا-تۇس كەلىپ وتىرعان بۇل ماراپاتتىڭ ورنى بولەك. ويتكەنى، ءبىزدىڭ وتباسىمىزعا دا 30 جىل تولىپ وتىر»، دەيدى وتاعاسى.
ەستەرىڭىزگە سالا كەتەيىك، «مەرەيلى وتباسى – 2021» ۇلتتىق بايقاۋىنا قاتىسۋ ءۇشىن بيىلعى جىلى وبلىس بويىنشا 184 وتباسى ءوتىنىش بىلدىرگەن. وبلىستاعى بارلىق اۋدان، قالالاردا ۇيىمداستىرىلعان بايقاۋدىڭ العاشقى كەزەڭىندە 30 وتباسى جەڭىمپاز اتانعان بولاتىن.
ءاليحان فايزحانوۆ
