«Mereıli otbasy – 2021» ulttyq baıqaýynyń jeńimpazdary prezıdent syılyǵymen marapattaldy. Oblystyq kezeńderde top jarǵan 17 otbasyny marapattaý rásimi onlaın formatta ótti.
Túrkistan oblysynan jeńimpaz atanǵan Jamalovtar otbasyna marapatty oblys ákiminiń orynbasary Arman Jetpisbaev tabystap, óńirdegi otbasylyq tárbıeni qalyptastyrýǵa qosqan úlesi úshin aıryqsha alǵysyn bildirdi. Baıqaý jeńimpazdaryna arnaıy statýetka men qomaqty qarjylaı syılyq tabys etildi.
«Búgin men úshin erekshe kún. Sebebi, Prezıdentten osyndaı marapat alý buıyrǵan eken. Qarapaıym aýyldan shyǵyp, sharýa qojalyǵymen aınalysatyn januıamyz. «Mereıli otbasy» konkýrsyna qatysyp, jeńimpaz atanyp otyr. Elbasymyzdyń salyp bergen sara jolynyń arqasynda elimiz órkendep, ulttyq qundylyqtarymyz órkendep keledi. Táýelsizdigimizdiń 30 jyldyǵymen tuspa-tus kelip otyrǵan bul marapattyń orny bólek. Óıtkeni, bizdiń otbasymyzǵa da 30 jyl tolyp otyr», deıdi otaǵasy.
Esterińizge sala keteıik, «Mereıli otbasy – 2021» ulttyq baıqaýyna qatysý úshin bıylǵy jyly oblys boıynsha 184 otbasy ótinish bildirgen. Oblystaǵy barlyq aýdan, qalalarda uıymdastyrylǵan baıqaýdyń alǵashqy kezeńinde 30 otbasy jeńimpaz atanǵan bolatyn.
Álıhan Faızhanov
