ءال-فارابي اۋدانىندا ادام كوپ شوعىرلانعان 15 ورىنعا قالا تۇرعىندارى مەن قوناقتارى تەگىن سۋ ءىشۋى ءۇشىن اۋىزسۋ بۇرقاقتارىن (پيتەۆوي فونتان) ورناتۋ جوسپارلانىپ وتىر. اتالعان جوبا اۋدان دەمەۋشىلەرى ەسەبىنەن ءىرى ساۋدا ورتالىقتارى مەن ساياباقتارعا قويىلماق. بۇگىندە سۋبۇرقاقتاردىڭ ەسكيزى دايىندالىپ، دەمەۋشىلەرمەن كەلىسسوزدەر جۇرگىزىلىپ جاتىر.
بۇل جونىندە اۋدان اكىمى راشيد مىڭباەۆ @akimat_shymkent پاراقشاسىندا تۇرعىندارمەن تىكەلەي ەفيردە جۇزدەسۋ بارىسىندا ايتتى.
سونداي-اق، اۋدان باسشىسى تاعى ءبىر جاڭا باستامانىڭ قولعا الىنىپ جاتقانىن جەتكىزدى. اۋدان اۋماعىنا جولاۋشىلاردىڭ حابى سانالاتىن 10 نۇكتەگە سوڭعى ۇلگىدەگى «Smart» ايالدامالار سالىنباق. وندا تۇرعىنداردىڭ ىڭعايلىلىعى ءۇشىن تەگىن Wifi, سمارتفون قۋاتتاعىش كوزدەرى، كونديتسيونەر، قالانىڭ كارتاسى جانە مارشرۋت باعىتتارى كورسەتىلگەن ەلەكتروندى تاقتايشا ورناتىلادى.
اۋداننىڭ الەۋمەتتىك جاعدايىن جاقسارتۋعا نيەتتى ازاماتتاردى تىڭ يدەيالار مەن جاڭا باستامالاردى بىرگە جۇزەگە اسىرۋعا شاقىردى. ەفير سوڭىندا تۇرعىنداردان كەلىپ تۇسكەن سۇراقتارعا جاۋاپ بەردى.
"ادىرنا" ۇلتتىق پورتالى
