ەل تاۋەلسىزدىگىنىڭ 30 جىلدىعىنا وراي مەگاپوليس تەاترلارى بۇلدىرشىندەردى قۋانتۋعا كىرىسىپ كەتتى. «ەرتەگىلەر ەلىنە قوناقتا» شاراسىنىڭ اياسىندا شىمكەنت قالالىق ورىس دراما تەاترى، ءازىل – سىقاق جانە ساتيرا تەاترى، قۋىرشاق جانە جاسوسپىرىمدەر تەاترىنىڭ ونەرپازدارى بالاباقشالارعا باردى.
شىمكەنت قالالىق قالالىق ءازىل – سىقاق جانە ساتيرا تەاترى «اقزيا» بالاباقشاسىنىڭ بۇلدىرشىندەرىنە س.التاەۆتىڭ «كوڭىلدى كوبەلەكتەر» سپەكتاكلىن تارتۋ ەتتى.
كوبەلەكتەردىڭ ءداستۇرلى ءومىر ءسۇرۋ سالتىن ساقتاپ، ءوز تىرشىلىگىن قورعاۋ جولىندا سيقىرلى، ءارى جاعىمسىز كەيىپكەر ەيبەن جىبەرگەن زۇلىمدىقتىڭ ءبارىن جەڭىپ شىعۋى بۇلدىرشىندەرگە جاقسى مەن جاماندى اجىراتۋعا كومەكتەسسە، ارالار اراسىنداعى ارپالىس، قالپاقتى ادامنىڭ كومەگى، دارىگەر دارۋمەننىڭ ارەكەتى ولاردىڭ ەرتەگىلەر ەلىنە ساياحاتتاۋىنا مۇمكىندىك بەردى. بالاباقشانىڭ «قۇلپىناي»، «كاۋسار»، «قارلىعاش»، «كۇنشۋاق» توپتارىنىڭ تاربيەلەنۋشىلەرى ەرەكشە قۋاندى.
ال، قالالىق ورىس دراما تەاترى «داريا مارس» بالاباقشاسىنىڭ تاربيەلەنۋشىلەرىن ۆ.ءزيميننىڭ «جيلا-بىلا سىروەجكا» ەرتەگىسىمەن قۋانتتى. قويۋشى رەجيسسەر ا.پەتريچەنكونىڭ سپەكتاكلى بالالارعا ەرەكشە كوڭىل-كۇي سىيلادى.
شاراعا شىمكەنت قالالىق قۋىرشاق جانە جاسوسپىرىمدەر تەاترى دا اتسالىستى. ولار «ا-اينالايىن» بالاباقشاسىندا دوستىق پەن تاتۋلىقتى دارىپتەيتىن م.اباي-ءدىلدانىڭ «تۋعان كۇن» ەرتەگىسىن ساحنالاسا، «ارناۋلى مەكتەپ-ينتەرنات» وقۋشىلارىنا ءورت قاۋىپسىزدىگى مەن جول ەرەجەلەرىنە ارنالعان ءا. فايزۋللاۇلى «ءورت» ەرتەگىسىن قويدى.
بۇل ەرتەگىلەردىڭ ارقايسىسى بۇلدىرشىندەر مەن وقۋشىلاردىڭ جاقسىلىق پەن جاماندىق، ادىلدىك پەن ادامگەرشىلىك تۋرالى العاشقى كوزقاراستارىن قالىپتاستىرۋعا باعىتتالعان.
زاميرا الدابەرگەنوۆا
