El Táýelsizdiginiń 30 jyldyǵyna oraı megapolıs teatrlary búldirshinderdi qýantýǵa kirisip ketti. «Ertegiler eline qonaqta» sharasynyń aıasynda Shymkent qalalyq orys drama teatry, ázil – syqaq jáne satıra teatry, qýyrshaq jáne jasóspirimder teatrynyń ónerpazdary balabaqshalarǵa bardy.
Shymkent qalalyq qalalyq ázil – syqaq jáne satıra teatry «Aqzııa» balabaqshasynyń búldirshinderine S.Altaevtyń «Kóńildi kóbelekter» spektaklin tartý etti.
Kóbelekterdiń dástúrli ómir súrý saltyn saqtap, óz tirshiligin qorǵaý jolynda sıqyrly, ári jaǵymsyz keıipker Eıben jibergen zulymdyqtyń bárin jeńip shyǵýy búldirshinderge jaqsy men jamandy ajyratýǵa kómektesse, aralar arasyndaǵy arpalys, qalpaqty adamnyń kómegi, dáriger Dárýmenniń áreketi olardyń ertegiler eline saıahattaýyna múmkindik berdi. Balabaqshanyń «Qulpynaı», «Káýsar», «Qarlyǵash», «Kúnshýaq» toptarynyń tárbıelenýshileri erekshe qýandy.
Al, qalalyq orys drama teatry «Darııa Mars» balabaqshasynyń tárbıelenýshilerin V.Zımınniń «Jıla-byla Syroejka» ertegisimen qýantty. Qoıýshy rejısser A.Petrıchenkonyń spektakli balalarǵa erekshe kóńil-kúı syılady.
Sharaǵa Shymkent qalalyq qýyrshaq jáne jasóspirimder teatry da atsalysty. Olar «A-Aınalaıyn» balabaqshasynda dostyq pen tatýlyqty dáripteıtin M.Abaı-Dildániń «Týǵan kún» ertegisin sahnalasa, «Arnaýly mektep-ınternat» oqýshylaryna órt qaýipsizdigi men jol erejelerine arnalǵan Á. Faızýllauly «Órt» ertegisin qoıdy.
Bul ertegilerdiń árqaısysy búldirshinder men oqýshylardyń jaqsylyq pen jamandyq, ádildik pen adamgershilik týraly alǵashqy kózqarastaryn qalyptastyrýǵa baǵyttalǵan.
Zamıra ALDABERGENOVA
