«SHYMKENT ZHASTAR LIGASY» جوباسىنىڭ ەكىنشى ماۋسىمى باستالدى

1471
Adyrna.kz Telegram

ەل تاۋەلسىزدىگىنىڭ 30 جىلىنا وراي شىمكەنتتەگى جوعارعى سپورت شەبەرلىگى مەكتەبىندە قالا اكىمىنىڭ قولداۋىمەن «شىمكەنت جاستار ليگاسى» جوباسىنىڭ ەكىنشى كەزەڭى سالتاناتتى تۇردە اشىلدى.

سپورتتىق شارانىڭ رەسمي اشىلۋىنا قالا اكىمىنىڭ ءبىرىنشى ورىنباسارى شىڭعىس مۇقان، قالالىق ءبىلىم باسقارماسىنىڭ باسشىسى جانات تاجيەۆا، قالالىق دەنە شىنىقتىرۋ جانە سپورت باسقارماسىنىڭ باسشىسى باۋىرجان تۇمانباەۆ، قالالىق ىشكى ساياسات جانە جاستار ىستەرى جونىندەگى باسقارماسىنىڭ مىندەتىن اتقارۋشى مۇراتجان شوتانوۆ جانە جالپى ءبىلىم بەرۋ مەكەمەلەرىنىڭ ديرەكتورلارى، سونداي-اق، قاتىسۋشى كوماندالار جانە ولاردىڭ جانكۇيەر فان-كلۋبتارى قاتىستى.

جيىندا ءسوز العان شىڭعىس جۇمابەكۇلى جوبانىڭ ماڭىزدىلىعىنا توقتالىپ، جاس سپورتشىلارعا ساتتىلىك تىلەدى.

– قر پرەزيدەنتى قاسىم-جومارت توقاەۆتىڭ بۇقارالىق سپورتتى دامىتۋ بويىنشا بەرگەن تاپسىرماسى نەگىزىندە شىمكەنت قالاسى اكىمىنىڭ قولداۋىمەن جاستار ليگاسى بىلتىر العاش رەت ۇيىمداستىرىلدى. ءبىرىنشى كەزەڭدە 140 ءبىلىم بەرۋ ۇيىمىنان 500-دەن استام كوماندا جاساقتالىپ، 6 مىڭنان استام وقۋشى باعىن سىناعان. بيىل سپورتتىق سايىستىڭ ەكىنشى ماۋسىمىنىڭ سالتاناتتى اشىلۋىنا جينالدىق. بۇل سايىس جاستاردى تاباندى بولۋعا ۇيرەتەدى، - دەدى شىڭعىس مۇقان.

جاستاردىڭ بوس ۋاقىتىن ءتيىمدى پايدالانۋ، جاپپاي سپورتقا باۋلي وتىرىپ سالاۋاتتى ءومىر سالتىن ناسيحاتتاۋ، بۇقارالىق سپورتتى دامىتۋ ماقساتىندا ەكىنشى مارتە ۇيىمداستىرىلىپ وتىر. «شىمكەنت جاستار ليگاسى» جوباسى فۋتبول، ۆولەيبول، باسكەتبول، شاحمات سىندى سپورتتىڭ 4 تۇرىنەن جوعارى جانە ورتا ارناۋلى وقۋ ورىندارىنىڭ جاستارى جانە جالپى ءبىلىم بەرۋ مەكەمەلەرىنىڭ وقۋشىلارى اراسىندا وتكىزىلۋدە.

مۇنان سوڭ، ءىس-شارادا جارىستىڭ العاشقى ويىنى ءوتتى. باس تورەشىنىڭ بەكىتكەن كەستەسىنە سايكەس، قىزدار اراسىندا ۆولەيبول سپورت تۇرىنەن ا.پۋشكين اتىنداعى №1 مەكتەپ گيمنازياسى جانە ج.ايماۋىتوۆ اتىنداعى №64 مەكتەپ گيمنازياسىنىڭ كومانداسى اراسىندا تارتىستى ويىن بولدى. تۋرنيردە 2:0 ەسەبىمەن №64 مەكتەپتىڭ قۇراماسى باسىم ءتۇستى.

ايتا كەتەيىك، ءار اۋدانعا قاراستى مەكتەپتەر ءتورت توپقا ءبولىنىپ، قازان-مامىر ايلارىندا ءوزارا سايىسىپ،توپ جەڭىمپازدارى انىقتالادى. اۋداندارداعى ويىنداردان سوڭ ءوز توبىنان جەڭىمپاز بولىپ شىققان 16 مەكتەپتىڭ كوماندالارى ءساۋىر ايىندا 1/8 فينالدا ويىنداردى جالعاستىرادى. جارىس جەڭىمپازدارى مامىر ايىندا انىقتالىپ، ماراپاتتالادى.

ازامات جاپپار
فوتو سەرىك قوساەۆ

پىكىرلەر