ءۇشىنشى مەگاپوليستە «اتا-انا – ۇلتتىڭ ۇياسى» اتتى اتا-انالار فورۋمى باستالدى. «سەنىمەن بولاشاق» رەسپۋبليكالىق قوعامدىق بىرلەستىگى ۇيىمداستىرعان اۋقىمدى ءىس-شاراعا شىمكەنت قالاسىنىڭ اكىمدىگى قولداۋ كورسەتىپ وتىر.
العاش رەت وففلاين ءوتىپ جاتقان فورۋمعا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان، «سەنىمەن بولاشاق» قب قۇرىلتايشىسى نۇركەن اسانوۆ، قر اقپارات جانە قوعامدىق دامۋ مينيسترلىگى جاستار جانە وتباسى ىستەرى كوميتەتىنىڭ توراعاسى شاحماردان بايمانوۆ، «ءبىلىم-يننوۆاتسيا» حالىقارالىق قوعامدىق قورىنىڭ پرەزيدەنتى دارحان وتە، تۇركىستان وبلىستىڭ ادامي الەۋەتتى دامىتۋ باسقارماسىنىڭ باسشىسى راقىمبەك جولاەۆ، اتا-انالار مەن قالا تۇرعىندارى، باق وكىلدەرى قاتىستى.
پلەنارلىق وتىرىسقا «سەنىمەن بولاشاق» قوعامدىق بىرلەستىگىنىڭ توراعاسى، پەداگوگ عالىمبەك بەرماعانبەتوۆ مودەراتورلىق جاساپ، جۇرگىزىپ وتىردى. فورۋمعا قر ءبىلىم جانە عىلىم ۆيتسە-ءمينيسترى شولپان كارينوۆا ونلاين قوسىلىپ، ساتتىلىك تىلەدى.
– مۇنداي باستامالار، اتا-انالار فورۋمى – وتە ماڭىزدى. بالا تاربيەسى – ورتاق مۇددە. اتا-انا – مەكتەپ – وقۋشى ۇشتىگى تىعىز قاتىناستا جۇمىس ىستەسە، كوپ جەتىستىككە جەتەرىمىز ءسوزسىز. سەبەبى، بالالارىمىز، وقۋشىلاردىڭ ءبىلىمى مەن تاربيەسى ەرەسەكتەردىڭ باستى مىندەت-ماقساتى سانالادى. فورۋم جۇمىسىنا مينيستر اسحات ايماعامبەتوۆتىڭ اتىنان ساتتىلىك تىلەيمىن! – دەدى شولپان تاڭاتقىزى.
«سەنىمەن بولاشاق» رەسپۋبليكالىق قوعامدىق بىرلەستىگىنىڭ قۇرىلتايشىسى، قوعام قايراتكەرى نۇركەن اسانوۆ، اسىرەسە، پاندەميا ۇرپاق تاربيەسىنە سالعىرت قاراۋعا بولمايتىنىن ۇعىندىرعانىن، ينتەرنەت دامىعان زاماندا ءار اتا-انانىڭ بالالاردىڭ جانىنان ءاردايىم تابىلۋ ماڭىزدى ەكەنىنە توقتالدى. ال شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان بالا تاربيەسى ءار اتا-انانىڭ وزىنە تىكەلەي بايلانىستى ەكەنىنە باسا نازار اۋداردى.
– بالانى تاربيەلەۋ ءۇشىن الدىمەن ءوزىمىزدى تاربيەلەۋىمىز كەرەك. قاراپايىم مىسال رەتىندە ايتايىن، بارلىعىمىزدا دەرلىك ۇيالى تەلەفون بار. ستاتيستيكا بويىنشا ادام ءار 3 مينۋت سايىن سول تەلەفونعا قاراپ قويا بەرەدى. سويتە تۇرا بالاسىنا گادجەتكە قۇمار بولماۋدى ەسكەرتەدى. ال ول ءۇشىن ەرەسەك ادام الدىمەن ءوزى ۇلگى بولۋى كەرەك. وقۋشىلاردىڭ جانىندا مۇعالىمى 5-6 ساعات بولسا، تاۋلىكتىڭ قالعان ۋاقىتىندا اتا-اناسى بولادى. سوندىقتان، اتا-انا رەتىندە جاۋاپكەرشىلىكتى سەزىنۋىمىز كەرەك، – دەدى شىڭعىس جۇمابەكۇلى.
فورۋم بارىسىندا، قر اقپارات جانە قوعامدىق دامۋ مينيسترلىگى جاستار جانە وتباسى ىستەرى كوميتەتىنىڭ توراعاسى شاحماردان بايمانوۆ، «ءبىلىم-يننوۆاتسيا» حالىقارالىق قوعامدىق قورىنىڭ پرەزيدەنتى دارحان وتە، تۇركىستان وبلىستىڭ ادامي الەۋەتتى دامىتۋ باسقارماسىنىڭ باسشىسى راقىمبەك جولاەۆ ءسوز الىپ، بالا تاربيەسى جولىنداعى كوزقاراستارىمەن، ۇسىنىستارىمەن ءبولىستى.
پلەنارلىق جيىننان كەيىن فورۋم ءتۇرلى تاقىرىپتاعى سەمينار-ترەنينگتەرمەن جالعاستى. وندا بالا تاربيەسى سالاسىنداعى ەلجاس ەرتايۇلى، اسحان ابجانوۆ، عالىمبەك بەرماعانبەتوۆ سەكىلدى ساراپشى ماماندار تاجىريبەلەرىمەن ءبولىستى.
نۋرلان بەكتاەۆ
