شىمكەنت قالاسىنداعى «جاستار رەسۋرستىق ورتالىعى» سارايىندا تاۋەلسىزدىكتىڭ 30 جىلدىعىنا وراي انشىلىك ونەرىمەن تالاي قايىرىمدىلىق ىستەردىڭ ۇيىتقىسى بولعان جاس تالانت يەسى قاليەۆ ءساليحتىڭ «وزىڭە سەن» اتتى ونلاين قايىرىمدىلىق كونتسەرتى ءوتتى.
كونتسەرتتىڭ اشىلۋ سالتاناتىندا قۇتتىقتاۋ تىلەگىن جەتكىزگەن «جاستار رەسۋرستىق ورتالىعى» مەكەمەسىنىڭ باسشىسى ەرلان ايتباەۆ جاس ونەرپازدىڭ ونەر جولىنداعى ماقساتتارىنىڭ ورىندالۋىنا تىلەكتەستىك ءبىلدىردى.
—«وسەم دەگەن بالانىڭ بەتىن قاقپا، بەلىن بۋ» دەمەكشى، جاس ءانشىنىڭ ونەرىن سىيلاپ، تالانتىن تاماشالاۋعا كەلگەن كوپشىلىك قاۋىمعا العىس بىلدىرەمىن. ساليح قاليەۆ تاعدىردىڭ تالقىسىنا تۇسسە دە مويىماعان جان. وزىمەن قاتارلاس جاستارمەن يىق تىرەسە ارالاسىپ، قوعامدا ءوزىن بەلسەندى قىرىنان تانىتىپ جۇرگەن جاس تالانت. ەندەشە انىمەن جۇرەكتەردى باۋراعان ونەرپازدىڭ قايىرىمدىلىق ءىس-شاراسىنا قولداۋ ءبىلدىرىپ، قۇرمەت كورسەتۋىمىز كەرەك، - دەدى قالا جاستارىنىڭ جەتەكشىسى ە.ايتباەۆ.
كونتسەرت يەسى ساليح قاليەۆ جەتىمدەر ءۇيىنىڭ تۇلەگى. بالا كەزىنەن انشىلىكتى جانىنا سەرىك ەتىپ، وسى ونەرىمەن كوپشىلىكتىڭ ىقىلاسىنا بولەنگەن جان. ءانشىنى كوپكە تانىمال ەتكەن تاعى ءبىر قاسيەتى ونىڭ قايىرىمدىلىق باستامالارى. ونىڭ «ءبىر ءۇمىت»، «اناعا ساعىنىش» اتتى كونتسەرتتىك باعدارلامالارىنان تۇسكەن قاراجاتتار كەزىندە تالاي مۇقتاج وتباسىلاردىڭ شاڭىراعىنا شاتتىق سىيلادى.
— ءانشى بولۋدى بالا كەزدەن ارماندادىم. العا قويعان ماقساتىما جەتۋ ءۇشىن كوپ ەڭبەكتەندىم. ءتۇرلى ساحنالاردا ونەر كورسەتىپ، انشىلىك قابىلەتىمدى شىڭداۋعا بار كۇش-جىگەرىمدى سالدىم. كاسىبي مامان اتانۋ ءۇشىن لايىقتى ءبىلىم الۋعا تالپىندىم. ءسويتىپ م.اۋەزوۆ اتىنداعى وقۋ-دىڭ ونەر كافەدراسىنا وقۋعا ءتۇسىپ، مادەني ءىس-شارالار ۇيىمداستىرۋشى ماماندىعى بويىنشا ديپلوم الىپ شىقتىم. وسى رەتتە مەنىڭ تالانتىمدى اشىپ، شابىتىما قانات ءبىتىرىپ، انشىلىك ونەرگە قادام باسۋىما كوپ ەڭبەگىن سىڭىرگەن كەنتاۋ قالاسىنداعى سالالىق كوللەدجدىڭ تاربيە ءىسى جونىندەگى ورىنباسارى، ومىردەگى ۇستازىم ەلميرا امىرحانوۆاعا ەرەكشە العىسىمدى ايتامىن. ەندىگى ارمانىم ۇلكەن ساحنالاردا ءان شىرقاپ، وسى ونەردىڭ بيىك شىڭىن باعىندىرسام دەيمىن، - دەدى تالانتتى ونەرپاز سۇحبات بارىسىندا.
ءانشىنىڭ جەكە رەپەرتۋارىنداعى تۋىندىلاردان بولەك كونتسەرتتە حالىقارالىق بي بايقاۋلارىنىڭ لاۋرەاتى «قازىنا» بي ءانسامبلى سەكىلدى ونەر ۇجىمدارى دا ساحنا كورىگىن قىزدىردى. ال، قايىرىمدىلىق ءىس-شارادان تۇسكەن قاراجات بۇل جولى ساليح قاليەۆتىڭ وزىنە جۇمسالماق. جاس ونەر يەسى بۇل قارجىنى وزىنە پاتەر الۋ ءۇشىن «وتباسى بانكىنىڭ» باستاپقى جارناسىنا جاراتپاق.
ءانۋار جۇماشباەۆ
