Shymkent qalasyndaǵy «Jastar resýrstyq ortalyǵy» saraıynda Táýelsizdiktiń 30 jyldyǵyna oraı ánshilik ónerimen talaı qaıyrymdylyq isterdiń uıytqysy bolǵan jas talant ıesi Qalıev Salıhtiń «Ózińe sen» atty onlaın qaıyrymdylyq konerti ótti.
Konerttiń ashylý saltanatynda quttyqtaý tilegin jetkizgen «Jastar resýrstyq ortalyǵy» mekemesiniń basshysy Erlan Aıtbaev jas ónerpazdyń óner jolyndaǵy maqsattarynyń oryndalýyna tilektestik bildirdi.
—«Ósem degen balanyń betin qaqpa, belin bý» demekshi, jas ánshiniń ónerin syılap, talantyn tamashalaýǵa kelgen kópshilik qaýymǵa alǵys bildiremin. Salıh Qalıev taǵdyrdyń talqysyna tússe de moıymaǵan jan. Ózimen qatarlas jastarmen ıyq tirese aralasyp, qoǵamda ózin belsendi qyrynan tanytyp júrgen jas talant. Endeshe ánimen júrekterdi baýraǵan ónerpazdyń qaıyrymdylyq is-sharasyna qoldaý bildirip, qurmet kórsetýimiz kerek, - dedi qala jastarynyń jetekshisi E.Aıtbaev.
Konert ıesi Salıh Qalıev jetimder úıiniń túlegi. Bala kezinen ánshilikti janyna serik etip, osy ónerimen kópshiliktiń yqylasyna bólengen jan. Ánshini kópke tanymal etken taǵy bir qasıeti onyń qaıyrymdylyq bastamalary. Onyń «Bir úmit», «Anaǵa saǵynysh» atty konerttik baǵdarlamalarynan túsken qarajattar kezinde talaı muqtaj otbasylardyń shańyraǵyna shattyq syılady.
— Ánshi bolýdy bala kezden armandadym. Alǵa qoıǵan maqsatyma jetý úshin kóp eńbektendim. Túrli sahnalarda óner kórsetip, ánshilik qabyletimdi shyńdaýǵa bar kúsh-jigerimdi saldym. Kásibı maman ataný úshin laıyqty bilim alýǵa talpyndym. Sóıtip M.Áýezov atyndaǵy OQÝ-dyń óner kafedrasyna oqýǵa túsip, mádenı is-sharalar uıymdastyrýshy mamandyǵy boıynsha dıplom alyp shyqtym. Osy rette meniń talantymdy ashyp, shabytyma qanat bitirip, ánshilik ónerge qadam basýyma kóp eńbegin sińirgen Kentaý qalasyndaǵy salalyq kolledjdiń tárbıe isi jónindegi orynbasary, ómirdegi ustazym Elmıra Ámirhanovaǵa erekshe alǵysymdy aıtamyn. Endigi armanym úlken sahnalarda án shyrqap, osy ónerdiń bıik shyńyn baǵyndyrsam deımin, - dedi talantty ónerpaz suhbat barysynda.
Ánshiniń jeke repertýaryndaǵy týyndylardan bólek konertte halyqaralyq bı baıqaýlarynyń laýreaty «Qazyna» bı ansambli sekildi óner ujymdary da sahna kórigin qyzdyrdy. Al, qaıyrymdylyq is-sharadan túsken qarajat bul joly Salıh Qalıevtiń ózine jumsalmaq. Jas óner ıesi bul qarjyny ózine páter alý úshin «Otbasy bankiniń» bastapqy jarnasyna jaratpaq.
Ánýar JUMAShBAEV
