اۋىل شارۋاشىلىعى سالاسىنداعى ساراپشى، «شوپان اتا» قاۋىمداستىعىنىڭ توراعاسى الماسبەك سادىرباەۆ Qasqa Jol ارناسىنا بەرگەن سۇحباتىندا بيلىك باتىس وڭىرلەردە مال قىرىلىپ، جۇت بولىپ جاتقانىن مويىنداماي وتىرعانىن ايتتى، دەپ حابارلايدى "ادىرنا" ۇلتتىق پورتالى.
ونىڭ سوزىنشە، اۋىل شارۋاشىلىعى ءمينيسترى ەربول قاراشۇكەەۆ جاعدايدى ءبىلۋ ءۇشىن وڭىرلەردى دۇرىس ارالامايدى.
- ەربول قاراشۇكەەۆ ماڭعىستاۋعا بارىپ، ۇكىمەت تاراپىنان قاراجات بولگىزىپ بەردى دە ءوزى قاشىپ كەتتى. اينالايىن، سەن اۋىل شارۋاشىلىعى ءمينيسترىسىڭ، سەن و جەردەن كەتپەۋىڭ كەرەك. كەشە ەل شۋلاپ جاتقاندا، ول امەريكادا ءجۇردى. ول اقش-تا ەمەس، ماڭعىستاۋدا ءجۇرۋ كەرەك. سوندا جەتىلەپ جاتىپ، احۋالدىڭ ءبارىن كورۋ كەرەك. تەك دايىنداعان جەرگە بارىپ، سول جەردەن قايتادى. قايدا بارسا دا سول. جامبىل وبلىسىنا دا مەنەن كەيىن بارىپ، ءبىر-ەكى باي شارۋادا جولىعىپ قايتتى، - دەدى ول.
«بلاتنوي قويشى» اتانىپ كەتكەن سادىرباەۆ مينيسترگە ۇندەۋ جاساپ، باتىستاعى شارۋانىڭ قيىن حالىمەن بىرگە تانىسۋعا شاقىردى.
- ەربول، جىگىتسىڭ با، مەن ساعان كورسەتەيىن. اكىممەن بىرگە بارما، مەنىمەن بار. اكىم دايىنداعان جەرگە باراسىڭ سەن. سەن دەگەن بىلدەي ءبىر ەلدىڭ ءمينيسترىسىڭ. اۋىلدان شىققان ازاماتسىڭ، ءجۇرشى، مەن ساعان كورسەتەيىن. ءبىرىنشى بارعانىڭدا جانىڭدا تۇرىپ بەردىم عوي سەن سەنىڭ. ال سەن ەندى مەنىڭ جانىمدا تۇرىپ بەر. سودان كەيىن شەشىمدى قابىلدا. پرەزيدەنتكە جاعدايدى جەتكىزەتىن سەن، مەن ەمەس،- دەپ ايتتى ا.سادىرباەۆ.
"ادىرنا" ۇلتتىق پورتالى
