شىمكەنت قالاسىنىڭ دەنساۋلىق ساقتاۋ باسقارماسىنىڭ باسشىسى ب.پوزيلوۆ پەن ءبىلىم باسقارماسىنىڭ باسشىسى ج.تاجيەۆانىڭ قاتىسۋىمەن اقپاراتتىق-كوممۋنيتسيالىق ورتالىعىندا بالالارعا سالىناتىن ۆاكتسيناتسيا تۋرالى بريفينگ ءوتتى.
دەنساۋلىق ساقتاۋ باسقارماسى باسشىسىنىڭ ايتۋىنشا، ەلىمىزدە كوروناۆيرۋسقا قارسى سالىنىپ جاتقان ۆاكتسينانىڭ بارلىعى 18 جاستان اسقاندارعا ارنالعان.
«بالالارعا ۆاكتسينا سالىنادى ەكەن دەگەن قاۋەسەت حالىقتى ۇرەيلەندىرىپ جاتىر. ۆاكتسينانىڭ بالالارعا سالىناتىنىن راستايتىن ەشقانداي رەسمي قۇجات جوق. سوندىقتان مۇنداي اڭىز اقپاراتتى تاراتۋدى دوعارۋ كەرەك. ونىڭ بارلىعى حالىقتى الاڭداتۋ ماقساتىندا جاسالىپ جاتىر دەپ ويلايمىن. ال اعىمداعى جىلدىڭ 15-قىركۇيەگىنەن باستاپ ەلىمىزدە تۇماۋعا قارسى ەكپە سالدىرۋ جۇمىستارى باستالدى. بۇل ۆاكتسينا تۇرعىلىقتى مەكەن-جايى بويىنشا كەلىسىم بەرگەن جاعدايدا قاۋىپ قاتەر توبىنداعى ازاماتتارعا تەگىن سالىنادى. بارلىق قالا تۇرعىندارىن «وقۋشىلارعا كوۆيدكە قارسى ۆاكتسينا سالىنادى» دەگەن قاڭقۋ سوزدەرگە سەنبەۋگە شاقىرامىن»،-دەدى ب.پوزيلوۆ.
قالانىڭ باس دارىگەرى شىمكەنتتە ەپيدەميالوگيالىق جاعدايدىڭ تۇراقتالعاندىعىن اتاپ ءوتتى. بۇگىندە 1134 ازامات ستاتسيوناردا ەم قابىلداۋدا. توسەك-ورىن تولىمدىلىعى 45% قۇرايدى، 1366 توسەك ورنى بوس. ال قالا بويىنشا بۇگىندە I كومپونەنتپەن 443 287 ادامعا، ءىى كومپونەنتپەن 375 000 ادامعا ۆاكتسيناتسيالاۋ جاسالدى.
ءوز كەزىندە ءبىلىم باسقارماسىنىڭ باسشىسى ج.تاجيەۆا كەز-كەلگەن ۆاكتسينا اتا-انانىڭ رۇقساتىنسىز سالىنبايتىنىن جانە تارالىپ جاتقان اقپاراتتاردىڭ جالعان ەكەنىن ايتتى.
بۇگىنگى تاڭدا قالاداعى 203 مەكتەپتە 233 مىڭنان اسا وقۋشى وقيدى. بارلىق ءبىلىم بەرۋ مەكەمەلەرىندە سانيتارلىق تالاپ قاتاڭ ساقتالعان.
"ادىرنا" ۇلتتىق پورتالى
