تۇركىستان وبلىسى جەتىساي اۋدانىنىڭ شارۋالارى ماقتا تەرىمدى باستاپ كەتتى. شارۋالار بيىل ماقتا ونىمدىلىگى جاقسى بولعانىن ايتادى. ماقتا شارۋاشىلىعىمەن تۇراقتى تۇردە اينالىساتىن شارۋانىڭ ءبىرى شولپانقۇدىق ەلدى مەكەنىندەگى «نۇرعيسا» شارۋا قوجالىعىنىڭ يەسى نۇرعيسا سەيىلبەكوۆ. ول بيىل 5 گەكتار جەرگە ماقتا تۇقىمىن سەپكەن.
«اۋىل ادامدارى ماقتانىڭ ءاربىر كەلىسىن 20 تەڭگەدەن تەرىپ جاتىر. وزدەرىڭىز بىلەتىندەي ماقتا وزگە داقىلدار سياقتى 2-3 ايدا ءونىم بەرمەيدى. ۇزاق ۋاقىت پىسەتىن بولعاندىقتان كۇتىمدى دە كوپ جاسايمىز. وسىنداي بەينەتى كوپ شارۋاشىلىققا قولايلى جاعداي جاساپ، سۋ ماسەلەسىن شەشىپ بەرگەن اۋدان باسشىلارىنا العىستان باسقا ايتارىمىز جوق. ەگىستىك القاپتى ۋاقىتىلى سۋعارىپ وتىردىق. ماقتانىڭ كوسەك قۇرتتارى ازداپ ابىگەرگە سالعانى بولماسا، باسقا ماسەلە بولعان جوق. ءونىم ازىرگە جامان ەمەس. باستىسى ماقتا باعاسى جوعارى بولىپ شارۋالاردىڭ ەڭبەكتەرى جانسا ەكەن»، – دەدى ن.سەيىلبەكوۆ.
ايتا كەتەيىك، بيىل جەتىساي اۋدانىندا 44 مىڭنان استام جەرگە ماقتا ەگىلگەن. ماقتا جيناۋ ناۋقانىنا دەپ 200-دەن استام كومباين دايىندالعان.
"ادىرنا" ۇلتتىق پورتالى
