Túrkistan oblysy Jetisaı aýdanynyń sharýalary maqta terimdi bastap ketti. Sharýalar bıyl maqta ónimdiligi jaqsy bolǵanyn aıtady. Maqta sharýashylyǵymen turaqty túrde aınalysatyn sharýanyń biri Sholpanqudyq eldi mekenindegi «Nurǵısa» sharýa qojalyǵynyń ıesi Nurǵısa Seıilbekov. Ol bıyl 5 gektar jerge maqta tuqymyn sepken.
«Aýyl adamdary maqtanyń árbir kelisin 20 teńgeden terip jatyr. Ózderińiz biletindeı maqta ózge daqyldar sııaqty 2-3 aıda ónim bermeıdi. Uzaq ýaqyt pisetin bolǵandyqtan kútimdi de kóp jasaımyz. Osyndaı beıneti kóp sharýashylyqqa qolaıly jaǵdaı jasap, sý máselesin sheship bergen aýdan basshylaryna alǵystan basqa aıtarymyz joq. Egistik alqapty ýaqytyly sýǵaryp otyrdyq. Maqtanyń kósek qurttary azdap ábigerge salǵany bolmasa, basqa másele bolǵan joq. Ónim ázirge jaman emes. Bastysy maqta baǵasy joǵary bolyp sharýalardyń eńbekteri jansa eken», – dedi N.Seıilbekov.
Aıta keteıik, bıyl Jetisaı aýdanynda 44 myńnan astam jerge maqta egilgen. Maqta jınaý naýqanyna dep 200-den astam kombaın daıyndalǵan.
"Adyrna" ulttyq portaly
