قالا اكىمى گۇلجان قۇرمانبەكوۆا ازاماتتاردى جەكە وتىنىشتەرى بويىنشا قابىلداۋ كەزىندە جەكە كاسىپكەر اينۇر بەكتەمىرقىزى مەن ءمۇسليما راقىمجانوۆا تويحانانى مەكتەپكە اينالدىرۋ تۋرالى ۇسىنىس ايتتى.
اكىمنىڭ اپتا سايىنعى ءداستۇرلى قابىلداۋىنا بۇل جولى 20 تۇرعىن كەلگەن بولاتىن. ولاردىڭ اراسىندا تۇرعىن ءۇي ماسەلەسى مەن جۇمىسپەن قامتىلۋ جايى، جىلجىمايتىن مۇلىكتى زاڭداستىرۋ بويىنشا ارىز، شاعىمدار دا ايتىلدى. ەرەكشەلىگى سول ارىستىق قوس كاسىپكەر وزدەرىنىڭ يەلىگىندەگى تويحانانى جاۋىپ، 7 جىلدىق مەكتەپ اشۋعا اكىمنىڭ تىكەلەي ىقپال ەتۋىن سۇراي كەلگەن.
قالا اكىمىنە سەرىكتەسىنىڭ دە بۇيىمتايىن جەتكىزگەن اينۇر بەكتەمىرقىزى ءبىلىم ورداسىن اشۋعا تولىق مۇمكىندىگى بار بولعانىمەن، قۇجاتتامالىق راسىمدەۋ تۇرعىسىنان اكىمدىكتىڭ كومەگى قاجەتتىگىن العا تارتتى.
«بۇل ءوزى مەملەكەت باسشىسى قاسىم-جومارت كەمەلۇلىنىڭ كەشە عانا جاريا ەتكەن جولداۋىندا ايتىلعان تاپسىرمامەن تىكەلەي ۇشتاسادى. وتە قۇپتارلىق ۇسىنىس. سوندىقتان قالالىق جەر قاتىناستارى ءبولىمى مەن ساۋلەت-قۇرىلىس ءبولىمىنىڭ باسشىلارىنا شۇعىل تاپسىرما بەرەمىن. ولار وسى ماسەلەنى شەشۋدىڭ زاڭدى جولىن قاراستىرسىن»، – دەدى گۇلجان مامىتقىزى.
جەكە قابىلداۋ كەزىندە تاعى ءبىر قالا تۇرعىنى ساۋلە بەكزاتوۆا جەكە ماسەلەسىنەن بۇرىن كوپتىڭ كوكەيىندە جۇرگەن وزەكتى ماسەلەنى كوتەردى. بەس بالانىڭ اناسى ارىس قالاسىن ينتەرنەتپەن قامتۋ ۇدەرىسىنە كوڭىلى تولمايتىندىعىن جەتكىزدى. ايىنا 20 مىڭ تەڭگەگە جۋىق اقى تولەسە دە، ينتەرنەتتى ءتيىمدى پايدالانا الماي وتىرعان ول تۇتىنۋشى رەتىندە قۇقى شەكتەلىپ جاتقاندىعىن ايتتى.
بۇل ماسەلەگە قاتىستى قالا اكىمى اقپاراتتىق قاۋىپسىزدىك جانە مەملەكەتتىك كورسەتىلەتىن قىزمەتتەر مونيتورينگى ءبولىمىنىڭ باسشىسى الماس سۇلتانوۆقا شۇعىل تاپسىرما بەرىپ، ءتيىستى ۆەدومستولارمەن كەڭەسە وتىرىپ پروبلەمانى شەشۋدى جۇكتەدى.
"ادىرنا" ۇلتتىق پورتالى
