Qala ákimi Gúljan Qurmanbekova azamattardy jeke ótinishteri boıynsha qabyldaý kezinde jeke kásipker Aınur Bektemirqyzy men Múslıma Raqymjanova toıhanany mektepke aınaldyrý týraly usynys aıtty.
Ákimniń apta saıynǵy dástúrli qabyldaýyna bul joly 20 turǵyn kelgen bolatyn. Olardyń arasynda turǵyn úı máselesi men jumyspen qamtylý jaıy, jyljymaıtyn múlikti zańdastyrý boıynsha aryz, shaǵymdar da aıtyldy. Ereksheligi sol arystyq qos kásipker ózderiniń ıeligindegi toıhanany jaýyp, 7 jyldyq mektep ashýǵa ákimniń tikeleı yqpal etýin suraı kelgen.
Qala ákimine seriktesiniń de buıymtaıyn jetkizgen Aınur Bektemirqyzy bilim ordasyn ashýǵa tolyq múmkindigi bar bolǵanymen, qujattamalyq rásimdeý turǵysynan ákimdiktiń kómegi qajettigin alǵa tartty.
«Bul ózi Memleket basshysy Qasym-Jomart Kemelulynyń keshe ǵana jarııa etken Joldaýynda aıtylǵan tapsyrmamen tikeleı ushtasady. Óte quptarlyq usynys. Sondyqtan qalalyq jer qatynastary bólimi men sáýlet-qurylys bóliminiń basshylaryna shuǵyl tapsyrma beremin. Olar osy máseleni sheshýdiń zańdy jolyn qarastyrsyn», – dedi Gúljan Mamytqyzy.
Jeke qabyldaý kezinde taǵy bir qala turǵyny Sáýle Bekzatova jeke máselesinen buryn kóptiń kókeıinde júrgen ózekti máseleni kóterdi. Bes balanyń anasy Arys qalasyn ınternetpen qamtý úderisine kóńili tolmaıtyndyǵyn jetkizdi. Aıyna 20 myń teńgege jýyq aqy tólese de, ınternetti tıimdi paıdalana almaı otyrǵan ol tutynýshy retinde quqy shektelip jatqandyǵyn aıtty.
Bul máselege qatysty qala ákimi aqparattyq qaýipsizdik jáne memlekettik kórsetiletin qyzmetter monıtorıngi bóliminiń basshysy Almas Sultanovqa shuǵyl tapsyrma berip, tıisti vedomstolarmen keńese otyryp problemany sheshýdi júktedi.
"Adyrna" ulttyq portaly
