ۇلت ساۋلىعى – ەل بايلىعى. «Nur Otan» پارتياسى شىمكەنت قالالىق فيليالى جانىنداعى ۇلت دەنساۋلىعى ماسەلەلەرى جونىندەگى كەڭەستىڭ كەزەكتى وتىرىسى ءوتتى.
جيىندا دەنساۋلىق ساقتاۋ مەن سپورت سالالارىندا اتقارىلىپ جاتقان جۇمىستار مەن پاندەمياعا بايلانىستى دەنساۋلىق ساقتاۋ سالاسىنداعى ورىن العان وزەكتى پروبلەمالار تالقىلاندى.
الداعى ۋاقىتتا شاھارىمىزداعى دەنساۋلىق ساقتاۋ نىساندارىنا تەكسەرىس كۇشەيەدى. وسى ماقساتتا «Nur Otan» پارتياسىنىڭ شىمكەنت قالالىق فيليالى جانىنان «ۇلت دەنساۋلىعى ماسەلەلەرى» جونىندە قوعامدىق كەڭەسى قۇرىلدى.
ارنايى توپ پرايمەريز جەڭىمپازدارى، پارتيالىق كادرلىق رەزەرۆ وكىلدەرى، قالالىق ءماسليحات دەپۋتاتتارى ، دارىگەرلەر، ازاماتتىق قوعام وكىلى، بۇقارالىق اقپارات وكىلدەرى، ياعني جالپى سانى 9 ادامنان قۇرالعان.
پارتيا جانىنداعى ۇلت دەنساۋلىعى ماسەلەلەرى جونىندەگى كەڭەستىڭ توراعاسى ەسەنبەك سەركەباەۆتىڭ ايتۋىنشا، ارنايى قۇرىلعان توپ وسى ۋاقىتقا دەيىن دەنساۋلىق ساقتاۋ سالاسىنداعى بىرنەشە كەمشىلىكتەردى انىقتاعان.
اتاپ ايتقاندا، ولار №1 قالالىق ەمحاناسى، «انا مەن بالا» وڭالتۋ ورتالىعى، №2 قالالىق اۋرۋحاناسى مەن قالالىق پەرزەنتحانا ورتالىقتارىندا ورىن الىپ وتىر.
سونىمەن قاتار، كوشپەلى وتىرىستا قالامىزداعى ابدەن توزىعى جەتىپ، كۇردەلى جوندەۋدەن ءوتىپ جاتقان مەديتسينالىق مەكەمەلەر تۋرالى دا ايتىلدى. شىمكەنت قالاسىنىڭ دەنساۋلىق ساقتاۋ باسقارماسى باسشىسى باقىتجان پوزيلوۆ، ەپيدەميالىق جاعدايعا بايلانىستى جوعارىدا ايتىلعان قۇرىلىس جۇمىستارىنىڭ كەيىنگە شەگەرىلىپ، بەلگىلەنگەن مەرزىمنەن تاعى ءبىرشاما ۋاقىتقا سوزىلاتىندىعىن جەتكىزدى.
جيىن سوڭىندا شىمكەنت قالاسى دەنە شىنىقتىرۋ جانە سپورت باسقارماسى باسشىسىنىڭ ورىنباسارى ەرمەك دارمەنوۆ ءسوز الدى. پايدالانۋعا بەرۋ 2022 جىلعا جوسپارلانعان «مەتاللۋرگ» ستاديونى تۋرالى اقپار بەرگەن ول، قازىرگى تاڭدا جۇمىستار بەلگىلەنگەن كەستەگە سايكەس 70 %-عا ورىندالعانىن ايتتى.
سونداي-اق، جينالعاندار حالىق دەنساۋلىعىن جاقسارتۋ ماسەلەسىنە قاتىستى وزدەرىن الاڭداتقان ساۋالدارىن ورتاعا سالىپ، ءتيىستى مامانداردان جاۋاپ الدى.
ايتا كەتەيىك، اعىمداعى جىلدىڭ شىلدە ايىندا قوعامدىق كەڭەستىڭ ۇسىنىسى بويىنشا رەسپۋبليكادا العاش بولىپ شىمكەنتتەگى ەكپە ەگۋ بەكەتتەرىنە بەينەباقىلاۋ كامەرالارى ورناتىلعان.
اينۇر بەكاسانوۆا
