جەتىسايدا «Jetisai Plaza” ساۋدا-ويىن-ساۋىق كەشەنى سالىنادى

824
Adyrna.kz Telegram

تۇركىستان وبلىسى جەتىساي اۋدانىندا «JETISAI PLAZA» كوپ فۋنكتسيونالدى ويىن-ساۋىق كەشەنى سالىنادى. اسا اۋقىمدى جوبانى جۇزەگە اسىرۋ تۋرالى شەشىم اۋدان اكىمى مۇرات قادىربەكتىڭ «CITY DEVELOPMENT» جشس-ءنىڭ باسشىسى ەرلان نۇرماعامبەتوۆپەن وتكەن كەزدەسۋىندە جان-جاقتى تالقىلانىپ قابىلداندى.

كەزدەسۋ بارىسىندا اۋدان باسشىسى ينۆەستورلاردىڭ ۇسىنىسىنا قولداۋ ءبىلدىرىپ، جوبانى جوسپارعا ساي جۇزەگە اسىرۋعا ىقپال ەتۋ ءۇشىن جەرگىلىكتى اكىمدىك تاراپىنان ءتيىستى كومەكتەر كورسەتىلەتىنىن جەتكىزدى.

«بۇل جوبانى ىسكە اسىرۋ ءبىزدىڭ اۋدانىمىز ءۇشىن وتە ءتيىمدى بولماق. بىرىنشىدەن، 1300-گە جۋىق جەرگىلىكتى ازامات تۇراقتى جۇمىسقا ورنالاسادى. ەكىنشىدەن، كاسىپكەرلەرىمىزدىڭ اراسىندا باسەكەگە قابىلەتتى ورتا قالىپتاسادى. ۇشىنشىدەن، جەرگىلىكتى بيۋدجەتكە قوماقتى سالىق تۇسەدى. بۇدان بولەك، تۇرعىنداردىڭ بوس ۋاقىتتارىن كوڭىلدى وتكىزۋلەرىنە جاقسى جاعداي جاسالادى. ءبىر سوزبەن ايتقاندا اۋداننىڭ جان-جاقتى اسىرەسە ەكونوميكالىق تۇرعىدان دامۋىنا سەرپىن بەرەدى»، – دەدى اۋدان باسشىسى م.بولاتۇلى.

جوبانىڭ جالپى قۇنى 8,5 ملرد. تەڭگە. فرانتسۋز ارحيتەكتورى ماريو بارتيللانىڭ 2 قاباتتان تۇراتىن ساۋلەتتى جوباسىنىڭ اۋماعى 25 200 شارشى مەتر بولماق. وندا 1000 كولىككە ارنالعان اۆتوتۇراق، زاماناۋي اكۆاپارك، بالالارعا ارنالعان ويىن-ساۋىق ورتالىقتارى مەن سپورت الاڭشالارى قاراستىرىلعان.

سونداي-اق، عيماراتتا كينوتەاتر، اسحانالار مەن مەيرامحانالار، وتاندىق جانە شەتەلدىك برەند تاۋار وندىرۋشىلەرى ۇسىنعان ونىمدەرگە ارنالعان ساۋدا نۇكتەلەرى، تۇرمىستىق تەحنيكالار ساتاتىن دۇكەندەرمەن قامتىلماق. ودان بولەك، ورتالىقتىڭ جانىنان 14 كوپقاباتتى تۇرعىن ءۇي بوي كوتەرەتىن بولادى.

«JETISAI PLAZA» كوپ فۋنكتسيونالدى ساۋدا-ويىن-ساۋىق كەشەنىنىڭ قۇرىلىس جۇمىستارى 2022 جىلدىڭ مامىر ايىندا باستالىپ، 2023 جىلى اياقتالادى دەپ جوسپارلانۋدا.

ايتا كەتەيىك، بۇل ەلىمىزدەگى اۋدان ورتالىعىندا سالىنعالى تۇرعان ەڭ العاشقى كەشەن.

"ادىرنا" ۇلتتىق پورتالى 

 

پىكىرلەر