Túrkistan oblysy Jetisaı aýdanynda «JETISAI PLAZA» kóp fýnkıonaldy oıyn-saýyq kesheni salynady. Asa aýqymdy jobany júzege asyrý týraly sheshim aýdan ákimi Murat Qadyrbektiń «CITY DEVELOPMENT» JShS-niń basshysy Erlan Nurmaǵambetovpen ótken kezdesýinde jan-jaqty talqylanyp qabyldandy.
Kezdesý barysynda aýdan basshysy ınvestorlardyń usynysyna qoldaý bildirip, jobany josparǵa saı júzege asyrýǵa yqpal etý úshin jergilikti ákimdik tarapynan tıisti kómekter kórsetiletinin jetkizdi.
«Bul jobany iske asyrý bizdiń aýdanymyz úshin óte tıimdi bolmaq. Birinshiden, 1300-ge jýyq jergilikti azamat turaqty jumysqa ornalasady. Ekinshiden, kásipkerlerimizdiń arasynda básekege qabiletti orta qalyptasady. Úshinshiden, jergilikti bıýdjetke qomaqty salyq túsedi. Budan bólek, turǵyndardyń bos ýaqyttaryn kóńildi ótkizýlerine jaqsy jaǵdaı jasalady. Bir sózben aıtqanda aýdannyń jan-jaqty ásirese ekonomıkalyq turǵydan damýyna serpin beredi», – dedi aýdan basshysy M.Bolatuly.
Jobanyń jalpy quny 8,5 mlrd. teńge. Franýz arhıtektory Marıo Bartıllanyń 2 qabattan turatyn sáýletti jobasynyń aýmaǵy 25 200 sharshy metr bolmaq. Onda 1000 kólikke arnalǵan avtoturaq, zamanaýı akvapark, balalarǵa arnalǵan oıyn-saýyq ortalyqtary men sport alańshalary qarastyrylǵan.
Sondaı-aq, ǵımaratta kınoteatr, ashanalar men meıramhanalar, otandyq jáne sheteldik brend taýar óndirýshileri usynǵan ónimderge arnalǵan saýda núkteleri, turmystyq tehnıkalar satatyn dúkendermen qamtylmaq. Odan bólek, ortalyqtyń janynan 14 kópqabatty turǵyn úı boı kóteretin bolady.
«JETISAI PLAZA» kóp fýnkıonaldy saýda-oıyn-saýyq kesheniniń qurylys jumystary 2022 jyldyń mamyr aıynda bastalyp, 2023 jyly aıaqtalady dep josparlanýda.
Aıta keteıik, bul elimizdegi aýdan ortalyǵynda salynǵaly turǵan eń alǵashqy keshen.
"Adyrna" ulttyq portaly
