ستەپنوگوردەگى بوگەنباي باتىر اتىنداعى دارىندى بالالارعا ارنالعان مەكتەپ-ينتەرناتتا 8-سىنىپ وقۋشىلارى وزدەرىنەن ءبىر سىنىپ تومەن وقيتىنداردى سوققىعا جىققانى تۋرالى ۆيدەو تاراعان بولاتىن. بولعان جانجالدان كەيىن وسى مەكەمەنىڭ باسشىسى قىزمەتىنەن كەتتى، دەپ حابارلايدى "ادىرنا" ۇلتتىق پورتالى.
وقيعانىڭ ۆيدەوسى تارالعاننان كەيىن اقمولا وبلىسى اكىمى ەرمەك مارجىقپاەۆ ستەپنوگور قالاسىنا بارىپ، شۇعىل كەڭەس وتكىزدى. كەڭەستىڭ شەشىمىمەن بوگەنباي باتىر اتىنداعى دارىندى بالالارعا ارنالعان سپورت مەكتەپ-ينتەرناتىنىڭ ديرەكتورى تۇرسىنباي توققوجينوۆتى جۇمىستان بوساتىلدى.
ال وبلىستىق دەنەشىنىقتىرۋ جانە سپورت باسقارماسىنىڭ جەتەكشىسى اسەت بۇكىباەۆقا قاتاڭ سوگىس جاريالاندى.
بۇدان بولەك، ستەپنوگور قالاسى اكىمىنە ونىڭ ورىنباسارى گۇلناز ءابىلوۆانى تارتىپتىك جازاعا تارتۋ ۇسىنىسى ەنگىزىلدى. ول وسى سالاعا جاۋاپ بەرەدى. سونداي-اق كامەلەت جاسقا تولماعانداردىڭ قۇقىقتارىن قورعاۋ جونىندەگى كوميسسيانى باسقارادى.
شۇعىل جيىن كەزىندە مەكتەپ-ينتەرناتىندا بولعان وقيعانىڭ ءمان-جايى دا جاريالاندى.
ەسكە سالا كەتەيىك، 21 قازاندا 8-سىنىپ وقۋشىلارى جاتاقحانادا وزدەرىن ءبىر كلاسس تومەن وقىپ جۇرگەن بالالاردى سوققىعا جىققان. بىرەۋى ءبارىن ۆيدەوعا تۇسىرگەن.
سول كۇنى پسيحولوگ جاتاقحانانى ارالاعاندا ۆيدەونى كورىپ قالادى. سوسىن بىردەن ينتەرنات باسشىلىعىنا حابار بەردى. 29 قازاندا ديرەكتوردىڭ شەشىمىمەن بۇزاقىلىق جاساپ، وقۋشىلاردى سوققىعا جىققاندار وقۋدان شىعارىلدى.
الايدا ءبىلىم بەرۋ مەكەمەسىنىڭ باسشىلىعى قۇقىق قورعاۋ ورگاندارى مەن كامەلەتتىك جاسقا تولماعانداردىڭ ىستەرى جونىندەگى كوميسسياعا ەسەپ بەرمەگەن. وسىلايشا، ءتيىستى ورگاندارعا حابار بەرۋ ءتارتىبى بۇزىلدى.
ارتىنان ۆيدەو اتا-انالار چاتىندا تارادى. ءسويتىپ، 12 قاراشادا جەرگىلىكتى پابليكتە جاريالاندى. كەلەسى كۇنى كامەلەتتىك جاسقا تولماعانداردىڭ ىستەرى جونىندەگى كوميسسيانىڭ شۇعىل وتىرىسى ءوتتى.
ال اقمولا وبلىستىق پوليتسيا دەپارتامەنتى قىلمىستىق كودەكستىڭ 141-بابى (بالالاردىڭ ءومiرi مەن دەنساۋلىعىنىڭ قاۋiپسiزدiگiن قامتاماسىز ەتۋ جونiندەگi مiندەتتەردi تيىسىنشە ورىنداماۋ) جانە 194-بابى، 2-تارماعى (قورقىتىپ الۋ، ادامدار توبىنىڭ الدىن الا ءسوز بايلاسۋىمەن) بويىنشا سوتقا دەيىنگى تەرگەۋدى باستادى.
"ادىرنا" ۇلتتىق پورتالى
