Stepnogordegi Bógenbaı batyr atyndaǵy daryndy balalarǵa arnalǵan mektep-ınternatta 8-synyp oqýshylary ózderinen bir synyp tómen oqıtyndardy soqqyǵa jyqqany týraly vıdeo taraǵan bolatyn. Bolǵan janjaldan keıin osy mekemeniń basshysy qyzmetinen ketti, dep habarlaıdy "Adyrna" ulttyq portaly.
Oqıǵanyń vıdeosy taralǵannan keıin Aqmola oblysy ákimi Ermek Marjyqpaev Stepnogor qalasyna baryp, shuǵyl keńes ótkizdi. Keńestiń sheshimimen Bógenbaı batyr atyndaǵy daryndy balalarǵa arnalǵan sport mektep-ınternatynyń dırektory Tursynbaı Toqqojınovty jumystan bosatyldy.
Al oblystyq deneshynyqtyrý jáne sport basqarmasynyń jetekshisi Áset Búkibaevqa qatań sógis jarııalandy.
Budan bólek, Stepnogor qalasy ákimine onyń orynbasary Gúlnáz Ábilovany tártiptik jazaǵa tartý usynysy engizildi. Ol osy salaǵa jaýap beredi. Sondaı-aq kámelet jasqa tolmaǵandardyń quqyqtaryn qorǵaý jónindegi komıssııany basqarady.
Shuǵyl jıyn kezinde mektep-ınternatynda bolǵan oqıǵanyń mán-jaıy da jarııalandy.
Eske sala keteıik, 21 qazanda 8-synyp oqýshylary jataqhanada ózderin bir klass tómen oqyp júrgen balalardy soqqyǵa jyqqan. Bireýi bárin vıdeoǵa túsirgen.
Sol kúni psıholog jataqhanany aralaǵanda vıdeony kórip qalady. Sosyn birden ınternat basshylyǵyna habar berdi. 29 qazanda dırektordyń sheshimimen buzaqylyq jasap, oqýshylardy soqqyǵa jyqqandar oqýdan shyǵaryldy.
Alaıda bilim berý mekemesiniń basshylyǵy quqyq qorǵaý organdary men kámelettik jasqa tolmaǵandardyń isteri jónindegi komıssııaǵa esep bermegen. Osylaısha, tıisti organdarǵa habar berý tártibi buzyldy.
Artynan vıdeo ata-analar chatynda tarady. Sóıtip, 12 qarashada jergilikti pablıkte jarııalandy. Kelesi kúni kámelettik jasqa tolmaǵandardyń isteri jónindegi komıssııanyń shuǵyl otyrysy ótti.
Al Aqmola oblystyq polıııa departamenti Qylmystyq kodekstiń 141-baby (Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý) jáne 194-baby, 2-tarmaǵy (Qorqytyp alý, adamdar tobynyń aldyn ala sóz baılasýymen) boıynsha sotqa deıingi tergeýdi bastady.
"Adyrna" ulttyq portaly
