شىمكەنتتە گيد-ەكسكۋرسوۆودتارعا سۇرانىس ارتىپ وتىر

1148
Adyrna.kz Telegram

شىمكەنت قالاسىنا كەلۋشى تۋريستەرگە قىزمەت كورسەتىپ، تاريحي، مادەني جانە باسقا دا نىسانداردى تانىستىراتىن گيد-ەكسكۋرسوۆودتاردىڭ سانى ارتۋدا. شاھارعا كەلۋشى قوناقتاردىڭ ەڭ ءجيى باراتىن نىساندار قاتارىنا ەڭ الدىمەن قوناق ۇيلەر، تاماقتاندىرۋ ورىندارى جانە دەمالىس ايماقتارى كىرەدى.

2200 جىلدىق تاريحى بار شىمكەنت قالاسى «قازاقستاننىڭ كيەلى جەرلەرىنىڭ گەوگرافياسى» جوباسىنا ەنگەن، كونە جانە قاسيەتتى ورىندارعا باي قالا بولىپ سانالادى. ماسەلەن، شىمكەنت قالاسىندا تاريحي-مادەني ورىندار تىزىمىندەگى ەسكى قالاشىق اۋماعىنداعى «تسيتادەل» قورعانى، يبراگيم اتا جانە قاراشاش انا كەسەنەلەرى، مارتوبە، حىزىر مۇناراسى، «قىلۋەت» ەتنو-مۋزەيى، قوشقار اتا كەسەنەسى، ءداۋىتۇلى شىڭعىسباي قاجى سىندى تاريحي نىساندار جەتەرلىك.

اتالعان تاريحي ورىندارعا قازاقستاننىڭ وزگە قالالارىنان جانە شەت ەلدەردەن كەلۋشى ازاماتتار قاتارى كوبەيگەن. ولار مىندەتتى تۇردە قالانىڭ كورىكتى جەرلەرىمەن قاتار تاريحي ورىندارىن دا تاماشالايدى. سول سەبەپتى، ولارعا قىزمەت ەتەر گيد-ەكسكۋرسوۆودتارعا دا ەرەكشە نازار اۋدارىلعان.

شىمكەنت قالاسىنىڭ تۋريزم جانە سىرتقى بايلانىستار باسقارماسىنىڭ مالىمەتىنە سايكەس، قالادا 60-تان اسا گيد-ەكسكۋرسوۆود بار. ولار قازاق تىلىمەن قاتار، ورىس، اعىلشىن، تۇرىك، نەمىس، يسپان تىلدەرىن جەتىك مەڭگەرگەن. مامانداردىڭ ايتۋىنشا، قالاعا كەلۋشىلەردىڭ باسىم بولىگى اعىلشىن جانە تۇرىك تىلدەرىندە ءجيى اقپارات سۇرايدى. بۇل ستاتيستيكا شىمكەنت قالاسىنا تۇرىكتەر مەن ەۆروپالىقتار ءجيى كەلەتىنىن اڭعارتادى.

ايتا كەتەرلىگى، باسقارماعا قاراستى «Visit Shymkent» تۋريستىك اقپاراتتىق ورتالىعى جىل سايىن گيدتەردىڭ بىلىكتىلىكتەرىن ارتتىرۋ ماقساتىندا بىرنەشە سەمينار-ترەنينگ وتكىزەدى. ودان وزگە، ورتالىقتىڭ Visit-Shymkent.kz ينتەرنەت پورتالىندا «گيد-ەكسكۋرسوۆودتار» ءبولىمى ارقىلى ولاردىڭ قىزمەتى تۋرالى تولىق انىقتاما الۋعا بولادى، ياعني، كەز-كەلگەن تۋريست پورتالدى اشىپ، قالاعان ساياحاتتى تاڭداي الادى.

شىمكەنت قالاسىنا كەلگەن ءاربىر قوناق شاھاردىڭ كوركەم جەرلەرىن، تاريحي-مادەني ەسكەرتكىشتەرىن جانە تابيعاتى مەن حالىقتىڭ تىنىس-تىرشىلىگىمەن تانىسۋعا قىزىعىپ، گيدتار مەن اۋدارماشىلاردىڭ قىزمەتىنە سۇرانىسپەن جۇگىنىپ وتىرادى.

"ادىرنا" ۇلتتىق پورتالى 

پىكىرلەر