Shymkent qalasyna kelýshi týrısterge qyzmet kórsetip, tarıhı, mádenı jáne basqa da nysandardy tanystyratyn gıd-ekskýrsovodtardyń sany artýda. Shaharǵa kelýshi qonaqtardyń eń jıi baratyn nysandar qataryna eń aldymen qonaq úıler, tamaqtandyrý oryndary jáne demalys aımaqtary kiredi.
2200 jyldyq tarıhy bar Shymkent qalasy «Qazaqstannyń kıeli jerleriniń geografııasy» jobasyna engen, kóne jáne qasıetti oryndarǵa baı qala bolyp sanalady. Máselen, Shymkent qalasynda tarıhı-mádenı oryndar tizimindegi eski qalashyq aýmaǵyndaǵy «ıtadel» qorǵany, Ibragım ata jáne Qarashash ana keseneleri, Mártóbe, Hyzyr munarasy, «Qylýet» etno-mýzeıi, Qoshqar ata kesenesi, Dáýituly Shyńǵysbaı qajy syndy tarıhı nysandar jeterlik.
Atalǵan tarıhı oryndarǵa Qazaqstannyń ózge qalalarynan jáne shet elderden kelýshi azamattar qatary kóbeıgen. Olar mindetti túrde qalanyń kórikti jerlerimen qatar tarıhı oryndaryn da tamashalaıdy. Sol sebepti, olarǵa qyzmet eter gıd-ekskýrsovodtarǵa da erekshe nazar aýdarylǵan.
Shymkent qalasynyń Týrızm jáne syrtqy baılanystar basqarmasynyń málimetine sáıkes, qalada 60-tan asa gıd-ekskýrsovod bar. Olar qazaq tilimen qatar, orys, aǵylshyn, túrik, nemis, ıspan tilderin jetik meńgergen. Mamandardyń aıtýynsha, qalaǵa kelýshilerdiń basym bóligi aǵylshyn jáne túrik tilderinde jıi aqparat suraıdy. Bul statıstıka Shymkent qalasyna túrikter men evropalyqtar jıi keletinin ańǵartady.
Aıta keterligi, basqarmaǵa qarasty «Visit Shymkent» týrıstik aqparattyq ortalyǵy jyl saıyn gıdterdiń biliktilikterin arttyrý maqsatynda birneshe semınar-trenıng ótkizedi. Odan ózge, ortalyqtyń Visit-Shymkent.kz ınternet portalynda «gıd-ekskýrsovodtar» bólimi arqyly olardyń qyzmeti týraly tolyq anyqtama alýǵa bolady, ıaǵnı, kez-kelgen týrıst portaldy ashyp, qalaǵan saıahatty tańdaı alady.
Shymkent qalasyna kelgen árbir qonaq shahardyń kórkem jerlerin, tarıhı-mádenı eskertkishterin jáne tabıǵaty men halyqtyń tynys-tirshiligimen tanysýǵa qyzyǵyp, gıdtar men aýdarmashylardyń qyzmetine suranyspen júginip otyrady.
"Adyrna" ulttyq portaly
