«نيزامحان» مەكتەبى كۇردەلى جوندەۋدەن سوڭ قايتا پايدالانۋعا بەرىلدى

1688
Adyrna.kz Telegram

نيزامحان سۋلايمانوۆ اتىنداعى ورتا مەكتەپ كۇردەلى جوندەۋدەن ءوتىپ پايدالانۋعا بەرىلدى. جاڭا وقۋ جىلىندا مەكتەپ تابالدىرىعىن اتتاعان بۇلدىرشىندەرگە ارنالعان العاشقى قوڭىراۋ سالتاناتتى ءىس-شاراسىنا قالالىق ءماسليحات حاتشىسى ءباھادۇر نارىمبەتوۆ قاتىستى.

مەكەمە باسشىلارى اعىمداعى وقۋ جىلى 1700 بالانى قابىلداعانىن ايتادى. ولاردىڭ مۇندا ساپالى ءبىلىم الۋى ءۇشىن بارلىق جاعداي جاسالعان.

سىرتقى كورىنىسى اق وردانى ەسكە تۇسىرەتىن مىنا مەكتەپ بيىل كۇردەلى جوندەۋدەن ءوتىپ، ەل يگىلىگى ءۇشىن قولدانىسقا بەرىلدى. نيزامحان سۋلايمانوۆ اتىنداعى ورتا مەكتەپتە بۇگىن 300-گە جۋىق بالا العاش رەت مەكتەپ تابالدىرىعىن اتتاپ وتىر. ءبىر جارىم جىلداي ءداستۇرلى وقىتۋ فورماتىندا ساباق وتپەگەن ۇستازدار دا وسى كۇندى اسىعا كۇتكەنىن ايتادى.

گۇلباعيرا ابدىمۇساەۆا، نيزامحان سۋلايمانوۆ اتىنداعى ورتا مەكتەپ مۇعالىمى: «بۇگىن 1 قىركۇيەك ءبىلىم كۇنى. تۇڭعىش رەت ونلاين فورماتتان كەيىن ەڭ العاشقى رەت وسى نيزامحان ورتا مەكتەبىنە العاشقى قادام باسقان بۇلدىرشىندەردى شىن جۇرەكتەن قۇتتىقتايمىن. مىنە، ءبىلىم ورداسىنا قاراڭىزدار. قانشاما جاڭادان بالالار كەلىپ وتىر. ەڭ العاشقى جاڭا مەكتەپتە جاڭا قادام باسىپ وتقان وسى بۇلدىرشەندەردى قۇتتىقتايمىن. العاشقى قوڭىراۋ قۇتتى بولسىن».

كارانتين تالاپتارىنا بايلانىستى بۇلدىرشىندەردىڭ اتا-انالارى سالتاناتتى ءىس-شارانى مەكتەپ اۋلاسىنان باقىلادى. بىراق، ولاردىڭ جۇزىندە ەشقانداي ۋايىم جوق. ولار وسىنداي زاماناۋ تالاپقا ساي سالىنعان كەرەمەت مەكتەپتەن بولاشاعى جارقىن ازاماتتار شىعادى دەپ سەنەدى.

انافيا كاديروۆا، شىمكەنت قالاسىنىڭ تۇرعىنى:

«وسى جەرگە، قۇداي قالاسا، جاڭا مەكتەپكە جاڭا وقۋ جىلىمەن بۇگىن نەمەرەمدى اكەپ وتىرمىن. نەمەرەمنىڭ العاشقى قادامى قۇتتى بولىپ، وسى جاقتان تارىداي بوپ كىرىپ، تاۋداي بوپ شىعىپ، ۇلكەن، ءبىلىمدى ازاماتشا بولسىن. مىناۋ ەلىمىزدە بولىپ جاتقان كوروناۆيرۋس جامان ىندەتتەر كەتىپ، وسى 2 جىلدان بەرى وقۋ جىلدارى بولماي، بالالارمىزدىڭ ءبارى ەمىن-ەركىن وقىپ، ەلىمىزدە تىنىشتىق بولسىن».

بۇل مەكتەپتىڭ باسقالاردان ەرەكشەلىگى بالالاردى تەست ارقىلى بايقاۋدان وتكىزىپ، ناتيجەسىندە جاقسى كورسەتكىشكە يە بولعاندار نيزامحان سۋلايمانوۆ اتىنداعى اي سايىن بەرىلەتىن ستەپەندياعا قول جەتكىزەدى. وعان تەك 5-11 سىنىپ وقۋشىلارىنىڭ مۇمكىندىگى بار. شاكىرتاقىنىڭ مولشەرى 10 مىڭ مەن 25 مىڭ ارالىعى.

گۇلشات بازارقۇلوۆا، نيزامحانوۆ سۋلايمانوۆ اتىنداعى ورتا مەكەپ ديرەكتورىنىڭ وقۋ ءىسى جونىندەگى ورىنباسارى: «قازىرگى زاماناۋي تالاپقا ساي بارلىق سىنىپ بولمەلەرى ينتەراكتيۆنىي تاقتامەن، كومپيۋتەرلى كابينەتتەرمەن، سپورتزالىمىز بار، اسحانامىز بار، بالالاردىڭ وقىپ ءبىلىم الۋىنا تولىق جاعداي جاسالعان. قازىرگى تاڭدا 100-دەي مامانىمىز بار. بارلىعى جوعارى ءبىلىمدى، وتە دارەجەلى كەرەمەت مۇعالىمدەرىمىز بار جانە قوسىمشا ۇيىرمەلەرىمىز بار، سپورت سەكتسيالارىمىز بار».

جالپى نيزامحان سۋلايمانوۆ اتىنداعى ورتا مەكتەپ 2200 بالاعا لايىقتاپ سالىنعان. اعىمداعى جىلى وقۋعا 1700 بالانى قابىلداپ وتىر. بيىل مۇندا 3 سىنىپتان تۇراتىن 76 مەكتەپ ءبىتىرۋشى تۇلەك اياقتايدى دەپ كۇتىلۋدە. ونىڭ تورتەۋى التىن بەلگىگە ۇمىتكەر.

"ادىرنا" ۇلتتىق پورتالى

پىكىرلەر