«Nızamhan» mektebi kúrdeli jóndeýden soń qaıta paıdalanýǵa berildi

1689
Adyrna.kz Telegram

Nızamhan Sýlaımanov atyndaǵy orta mektep kúrdeli jóndeýden ótip paıdalanýǵa berildi. Jańa oqý jylynda mektep tabaldyryǵyn attaǵan búldirshinderge arnalǵan alǵashqy qońyraý saltanatty is-sharasyna qalalyq máslıhat hatshysy Bahadúr Narymbetov qatysty.

Mekeme basshylary aǵymdaǵy oqý jyly 1700 balany qabyldaǵanyn aıtady. Olardyń munda sapaly bilim alýy úshin barlyq jaǵdaı jasalǵan.

Syrtqy kórinisi Aq ordany eske túsiretin myna mektep bıyl kúrdeli jóndeýden ótip, el ıgiligi úshin qoldanysqa berildi. Nızamhan Sýlaımanov atyndaǵy orta mektepte búgin 300-ge jýyq bala alǵash ret mektep tabaldyryǵyn attap otyr. Bir jarym jyldaı dástúrli oqytý formatynda sabaq ótpegen ustazdar da osy kúndi asyǵa kútkenin aıtady.

Gúlbaǵıra Ábdimusaeva, Nızamhan Sýlaımanov atyndaǵy orta mektep muǵalimi: «Búgin 1 qyrkúıek bilim kúni. Tuńǵysh ret onlaın formattan keıin eń alǵashqy ret osy Nızamhan orta mektebine alǵashqy qadam basqan búldirshinderdi shyn júrekten quttyqtaımyn. Mine, bilim ordasyna qarańyzdar. Qanshama jańadan balalar kelip otyr. Eń alǵashqy jańa mektepte jańa qadam basyp otqan osy búldirshenderdi quttyqtaımyn. Alǵashqy qońyraý qutty bolsyn».

Karantın talaptaryna baılanysty búldirshinderdiń ata-analary saltanatty is-sharany mektep aýlasynan baqylady. Biraq, olardyń júzinde eshqandaı ýaıym joq. Olar osyndaı zamanaý talapqa saı salynǵan keremet mektepten bolashaǵy jarqyn azamattar shyǵady dep senedi.

Anafııa Kadırova, Shymkent qalasynyń turǵyny:

«Osy jerge, qudaı qalasa, jańa mektepke jańa oqý jylymen búgin nemeremdi ákep otyrmyn. Nemeremniń alǵashqy qadamy qutty bolyp, osy jaqtan tarydaı bop kirip, taýdaı bop shyǵyp, úlken, bilimdi azamatsha bolsyn. Mynaý elimizde bolyp jatqan koronavırýs jaman indetter ketip, osy 2 jyldan beri oqý jyldary bolmaı, balalarmyzdyń bári emin-erkin oqyp, elimizde tynyshtyq bolsyn».

Bul mekteptiń basqalardan ereksheligi balalardy test arqyly baıqaýdan ótkizip, nátıjesinde jaqsy kórsetkishke ıe bolǵandar Nızamhan Sýlaımanov atyndaǵy aı saıyn beriletin stependııaǵa qol jetkizedi. Oǵan tek 5-11 synyp oqýshylarynyń múmkindigi bar. Shákirtaqynyń mólsheri 10 myń men 25 myń aralyǵy.

Gúlshat Bazarqulova, Nızamhanov Sýlaımanov atyndaǵy orta mekep dırektorynyń oqý isi jónindegi orynbasary: «Qazirgi zamanaýı talapqa saı barlyq synyp bólmeleri ınteraktıvnyı taqtamen, kompıýterli kabınettermen, sportzalymyz bar, ashanamyz bar, balalardyń oqyp bilim alýyna tolyq jaǵdaı jasalǵan. Qazirgi tańda 100-deı mamanymyz bar. Barlyǵy joǵary bilimdi, óte dárejeli keremet muǵalimderimiz bar jáne qosymsha úıirmelerimiz bar, sport sekııalarymyz bar».

Jalpy Nızamhan Sýlaımanov atyndaǵy orta mektep 2200 balaǵa laıyqtap salynǵan. Aǵymdaǵy jyly oqýǵa 1700 balany qabyldap otyr. Bıyl munda 3 synyptan turatyn 76 mektep bitirýshi túlek aıaqtaıdy dep kútilýde. Onyń tórteýi Altyn belgige úmitker.

"Adyrna" ulttyq portaly

Pikirler